Адольф Ҳитлер ўлими борасида сон-саноқсиз тахминларга, у ўлмагани ва Антарктидага тўртинчи рейхни барпо этиш учун кетгани ҳақидаги фаразларга нуқта қўйилди. Ҳитлер аниқ Берлинда 1945 йилда, цианид заҳари ва ўқдан ўлган. Бу ҳақда диктаторнинг Москвада сақланган тиш бўлагига таяниб франциялик тадқиқотчилар маълум қилишди.
“Бу тишлар Ҳитлерники, бунга шубҳа йўқ. Тадқиқотларимиз Ҳитлернинг 1945 йилда ўлганини исботлайди”, деб айтган профессор Филипп Шарлье. “Биз Ҳитлер ҳақидаги барча фитналарга чек қўя оламиз. У Аргентинага сув ости кемасида қочмаган, Антарктидадаги яширин базада ёки Ойнинг қоронғи томонида яширинмаган”, дейди олим.
Тадқиқот натижалари European Journal of Internal Medicine журналида чоп этилган.
Ҳитлернинг ёмон тишлари ва кўплаб протезлари таҳлили уларда оқ қатлам (тошлар) борлигини ва ҳеч қандай гўшт қолдиқлари йўқлигини кўрсатган. Диктатор вегетариан бўлган, деб айтмоқда олим. 2017 йил март ва июлида Россия Федерал хавфсизлик хизмати ва давлат архиви олимларга Ҳитлер суякларини тадқиқ қилишга рухсат берган. Французлар фюрернинг боши суягини тадқиқ қилишга муваффақ бўлишган. Бош суягида чап томондан эҳтимол ўқ ўтишидан қолган тешик топилган.
Умуман олганда, тадқиқот Ҳитлер 1945 йил 30 апрелда Берлиндаги бункерида рафиқаси Ева Браун билан ўлгани ҳақидаги умумқабул қилинган тахминни тасдиқлади. Бироқ олимлар энди фюрер айнан нимадан ўлгани борасида бошлари қотган: ўқми ёки цианидли ампулами? Униси ҳам, буниси ҳам бўлиши мумкин. Бундан ташқари, Ҳитлер бош суяги оғиз қисмида порох излари топилмаган ва демак, тўппонча оғизга эмас, бўйин ёки пешонага қаратилган бўлиши мумкин.
Олимларнинг фикрича, тиш протезларидаги кўкимтир қатлам цианид ва протезлардаги металлнинг кимёвий реакцияга киришганидан дарак бериши мумкин.
