Берлинда уруш олиб бораётган давлат байроқлари бўлмаслиги керак, деди ҳукмрон бургомистр Кай Вегнер. 8 ва 9 май кунларидаги акциялар вақтида шаҳарда совет ва Россия рамзлари тақиқланган.
Берлиннинг ҳукмрон бургомистри Кай Вегнер Европада 8-9 май кунлари нишонланадиган Иккинчи жаҳон уруши якунланган сана муносабати билан шаҳар ва унинг атрофидаги ҳудудлардаги совет обидалари яқинида рус рамзлари тақиқлангани ҳақида фикр билдирди.
«Бугун биз 8 майни, озодлик кунини, уруш тугаган кунни нишонлаяпмиз ва ҳозирда уруш олиб бораётган мамлакатларнинг байроқлари бу ерда кўрсатилмаслиги керак», деди Вегнер DW мухбирининг саволига жавоб берар экан.
Унинг қўшимча қилишича, Берлин полицияси ёдгорликларда навбатчилик қилади ва у ерда провокациялар бўлмаслигини таъминлайди. Бир кун аввал Берлин полицияси 8 ва 9 май кунлари Россия байроқлари, георгий ленталари, кийим-кечак, орденлар, ҳарбий ва марш қўшиқлари, шунингдек, Россиянинг Украинага қарши урушини мадҳ этувчи рамзлар, жумладан, Z белгисини тақиқлаш ҳақида буйруқ чиқарди.
Украинанинг Берлиндаги элчиси Россия қўшинлари ҳаракати ҳақида
Вегнер Украинанинг Германиядаги элчиси Алексей Макеев билан биргаликда уруш ва зулм қурбонлари хотирасига бағишланган Нойе Вахе Берлин мемориалига гулчамбар қўйди.
«Мен Берлин мэрига бугун Украинада уруш кетаётганини айтдим, руслар эса украиналиклар Иккинчи жаҳон уруши пайтида тўқнаш келган ҳаракатларни содир этмоқда», - деди Макеев DW мухбири билан суҳбатда. Дипломат ёдгорлик пойига гул қўйиб, украиналикларнинг нацизм устидан қозонилган ғалабага қўшган ҳиссасини ёдга олди.
Шунингдек, у Берлин полицияси раҳбари 8 ва 9 май кунларидаги акциялар чоғида Украина жамоатчилигини ҳимоя қилишни таклиф этганини айтди. Макеев совет ва Россия рамзларига эга намойишчилар томонидан провокациялар содир бўлса, ҳуқуқни муҳофаза қилиш органларини хабардор қилиш кераклигини билдирди. Бундай рамзлар Берлинда бўлмаслиги керак, дея таъкидлади Украина элчиси.
Шолц: Биз ҳар доим тинчлик ва эркинликни ҳимоя қилишимиз керак
Германия канцлери Олаф Шолц Иккинчи жаҳон уруши тугаган кун муносабати билан табрик эълон қилди. «8 май - Германия ва бутун дунё миллий социализм зулмидан озод қилинган кун. Бу кун бизга тинчлик, эркинлик, демократия ва қонун устуворлигини ҳар доим ҳимоя қилишимиз кераклигини эслатиб туради», - дейилади Шолцнинг ижтимоий тармоқдаги микроблогида.
Берлинда украинпараст ва россияпараст акциялар
8 май куни Берлинда бир қанча акциялар, жумладан, Тиргартендаги ҳалок бўлган совет аскарлари ёдгорлиги олдида россияпараст акция бўлиб ўтди. Ушбу тадбирга кремлпараст фаол Елена Колбасникова келди. DW мухбирининг воқеа жойидан хабар беришича, митинг иштирокчилари Украина байроғини кўтарган одам билан жанжаллашган. Бир неча соатдан кейин Россия элчихонаси олдида украинапараст фаолларнинг намойиши бўлиб ўтди.
Бу йил Европада Иккинчи жаҳон уруши тугаганига 79 йил тўлди. Германия ва бошқа Европа мамлакатларида тадбирлар 8 май куни, Россияда ва собиқ СССРнинг аксарият мамлакатларида фашистлар Германиясининг таслим бўлиши тўғрисидаги шартнома имзоланган вақт фарқи туфайли 9 майда ўтказилади.
Хотира тадбирлари Россиянинг Украинага қарши уруши фонида учинчи марта ўтказилмоқда. Ўтган икки йил давомида бу турли намойишчилар гуруҳлари аъзолари ўртасида низоларга олиб келди.
