Давлат барча экологик муаммоларни ҳал қилишга мажбурми?

Фаол фуқаролик позицияси атроф-муҳитни муҳофаза қилиш сиёсатининг муҳим элементидир. Марказий Осиё минтақавий экологик маркази (МОМЭМ) ижрочи директори Искандар Абдуллаев Халқаро Пресс-клубнинг 5 июнь - Халқаро атроф-муҳитни муҳофаза қилиш кунига бағишланган сессияси доирасида шундай баёнот берди.

"Марказий Осиё давлатлари ўз келажагини қандай кўрмоқчи эканига доир устувор йўналишларини белгилаб олиши муҳим. Бунда жамоатчиликнинг роли катта. Давлат барча экологик муаммоларни ҳал қилиши керак, дея фикрлаш нотўғри. Жамоатчилик, нодавлат секторлар ва шу минтақада яшовчи одамлар ҳам бу жараёнда фаол иштирок этишлари керак", - дейди Абдуллаев.

У шунингдек атроф-муҳит муҳофазасида халқаро ташкилотларнинг ролига ҳам тўхталиб ўтди.

"Таъкидлаш керакки, охирги 10 йилликда 3 миллиард АҚШ доллари кредит ва грантлар кўринишида айнан атроф-муҳит муҳофазасига йўналтирилган. Эҳтимол, бу бизнинг катта минтақамиз учун у қадар кўп эмасдир. Бироқ дунёда бошқа глобал муаммолар етарли эканини инобатга оладиган бўлсак, бу кам ҳам эмас", - дейди МОМЭМ ижрочи директори. Абдуллаевнинг таъкидлашича, Марказий Осиё мамлакатлари, жамоатчилик, халқаро ҳамкорлар биргаликда олдинга ҳаракат қилиши керак бўлган учликдир, уларнинг роли айнан ҳамкорликдаги фаолиятда намоён бўлади.

"Бундан ташқари, биз Марказий Осиёда велосипед ихтиро қилишимиз шарт эмас, чунки иқлимнинг ўзигариши, сув ресурслари билан боғлиқ муаммолар бутун дунёда ўз тарихига эга. Асосийси, биз шу билимларга очиқ бўлишимиз, уни қабул қилишимиз ва қўрқмаслигимиз керак. Қўрқувларимиз ортда қолиши керак. Барчаси бизнинг қўлимизда, бизнинг фаоллигимизда. Энг муҳим жиҳатлардан бири - Марказий Осиё мамлакатларининг аҳил қўшничилик ва ўзаро ишончли алоқалари", - қўшимча қилади у.