Мамлакатимизда соғлиқни сақлаш тизимида олиб борилаётган жадал ислоҳотлар самараси ўлароқ хусусий тиббиёт соҳаси ривожига ҳам алоҳида эътибор қаратилмоқда. Бу ҳақда Миллий матбуот марказида Соғлиқни сақлаш вазирлиги томонидан ташкил этилган «Хусусий тиббиёт тизимини ривожлантириш, ҳар томонлама қўллаб-қувватлаш ва янада рағбатлантириш масалалари» мавзусида бўлиб ўтган матбуот анжуманида алоҳида қайд этилди.
Таъкидлаб ўтилганидек, бу борада 2019—2025 йилларда Ўзбекистон Республикаси соғлиқни сақлаш тизимини ривожлантириш концепциясида белгиланган устувор йўналишлар ижроси муҳим ўрин тутмоқда. Жумладан, хусусий соғлиқни сақлаш тизими, давлат-хусусий шериклигини ва тиббий туризмни ривожлантириш, соғлиқни сақлаш соҳасига инвестицияларни кенг жалб этиш учун қулай шарт-шароитлар яратиш ва рақобат муҳитини яхшилаш борасида изчил саъй-ҳаракатлар олиб борилади. Эътиборли томони, рақобатни шакллантириш, ихтисослаштирилган тиббий хизматларни ривожлантириш, хусусий шифохоналарни кўпайтиришга жиддий аҳамият бериляпти.
«Президентимиз Шавкат Мирзиёевнинг 2017 йил 1 апрелдаги «Соғлиқни сақлаш соҳасида хусусий секторни янада ривожлантириш чора-тадбирлари тўғрисида»ги қарори соҳа ривожида муҳим қадам бўлди. Унга мувофиқ, хусусий тиббиёт муассасалари шуғулланиши мумкин бўлган тиббий ихтисосликлар 50тадан 126тага кўпайди. Хусусий клиникаларга қатор молиявий имтиёзлар берилди. Бундан ташқари, лицензия олиш учун берилган аризани кўриб чиқиш муддати 30 кундан 20 кунга қисқартирилди, лицензия олиш учун тўланадиган давлат божи энг кам иш ҳақининг 10 бараваридан 5 бараваригача камайтирилди. Бундан ташқари, Соғлиқни сақлаш вазирлигида Давлат-хусусий шерикликни ва тиббий туризмни ривожлантириш бош бошқармаси ташкил этилиши ҳам соҳа ривожида муҳим аҳамият касб этди. Натижада, хусусий тиббиёт муассасаларини ривожлантириш бўйича сезиларли ишлар амалга оширилиб, кўрилган чоралар туфайли 2018 йилда хусусий тиббиёт ташкилотлари сони 889тага кўпайиб, умумий сони 4670дан ошди.
Шунингдек, Ўзбекистон Республикаси Президентининг 2019 йил 16 апрелдаги «Соғлиқни сақлаш соҳасида давлат-хусусий шерикчилигини ривожлантириш бўйича чора-тадбирлар тўғрисида»ги қарори тиббиёт соҳасида янги даврни бошлаб берди, десак муболаға бўлмайди. Ушбу ҳужжат давлат ҳамда хусусий секторларнинг бирлагикда ишлаши, инвесторларнинг Ўзбекистон ҳудудида, давлат секторида фаол фаолият юритиши учун ҳуқуқий асос бўлиб хизмат қилади», дейилади Соғлиқни сақлаш вазирлиги Жамоатчилик билан алоқалар бўлими хабарида.
Анжуманда эндиликда инвесторлар ўзларига қулай бўлган муҳитда, ўзлари истаган давлат тиббиёт муассасаларига инвестиция кириш имкониятига эгалиги таъкидланган. Хусусий шерикни танлаб олиш тендер асосида ёки тўғридан-тўғри музокаралар ўтказиш орқали амалга оширилади. Битимнинг амал қилиш муддати давлат ва хусусий шерик томонидан белгиланиб, бунда у уч йилдан кам бўлмаслиги ва 49 йилдан ошмаслиги лозим бўлади.
Бундан ташқари, хориждан тиббий асбоб-ускунани ҳар қандай юридик шахс олиб келган тақдирда уларга нисбатан божхона имтиёзлари қўлланадиган бўлди. Мазкур қарори билан хорижий тиббиёт ускуналарини олиб кираётган тадбиркор ва инвесторлар учун умумий қиймати 200 миллион АҚШ доллари тенг бўлган имтиёзли кредитлар линияси очилади. Ушбу қарор билан белгиланган механизмларда давлат тиббиёт муассасаларида хусусий тиббиёт муассасалари учун тенг имкониятлар берилиб, инвесторларнинг давлат тиббиёт муассасаларига кириб, ҳамкорликда фаолият ташкил қилиш имконият яратиб беради.
Анжуманда тиббиётнинг халққа янада яқинлашуви, маҳаллий тиббиёт муассасаларининг инфраструктурасини яхшилаш, тиббий жиҳозлар ва технологияларни халқаро талабларга мос равишда юксалтириш, кадрлар малакасини ошириш, бир вақтнинг ўзида беморларда давлат ҳамда хусусий тиббиёт муассасаларини танлаш имкониятининг яратилиши каби кўплаб ижобий ўзгаришлар эътироф этилди.
