Kun.uz сайтида жорий йилнинг 17 июль куни «Конимех марказида объектлар бузилмоқда. Вилоят ҳокими тадбиркорларга зарарни тўлашдан бош тортмоқда» сарлавҳали танқидий мақола эълон қилинган эди.
Унда Конимех тумани маркази ва унинг атрофидаги дўконлар бузилаётгани, тадбиркорларнинг ҳуқуқлари очиқчасига поймол қилинаётгани, компенсация берилмаётгани ҳақида баён этилган эди.
Ушбу танқидий мақола юзасидан Конимех туман ҳокимлиги муносабат билдириб, таҳририятга маълумотнома тақдим қилди.
Маълумотномада таъкидланишича, тадбиркорларнинг савдо дўконлари эгаллаган ер майдонларини давлат ва жамоат эҳтиёжлари учун олиб қўйиш режалаштирилмаган.
Туман марказидаги аксарият савдо дўконлари 1990-1999 йилларда қурилгани, уларнинг қурилиш конструкциялари сейсмик талабларига, пойдевор, том ёпма қисми, деворлари шаҳарсозлик меъёрлари ва қоидаларига жавоб бермас экан.
Кўчмас мулк эгалари бўлган 60 нафардан зиёд киши ўзларининг ташаббуси билан туман ҳокими номига савдо дўконларини ўз ҳисобидан бузиб, қайта қуришга рухсат сўраб ёзма равишда мурожаат қилишган.
Шунингдек, муносабатда Ўзбекистон Республикаси президентининг 2019 йил 12-13 март кунлари Навоий вилоятига ташрифи давомида берилган топшириқлар ва кенгайтирилган тарзда ўтказилган 11-сон мажлис баёнида вилоят ҳокимлигига туман марказларини ободонлаштириш юзасидан тармоқ жадвалларини ишлаб чиқиш ва тасдиқлаш ҳамда ижросини қатъий назорат остида бажариш топшириғи берилгани, ушбу топшириқ ижроси юзасидан Конимех тумани 4та сектор раҳбарлари томонидан 2019 йил «Обод туман маркази» дастури доирасида Конимех туманида амалга ошириладиган қурилиш ва ободонлаштириш ишлари бўйича тармоқ жадвали ишлаб чиқилиб тасдиқлангани билдирилган.
Муносабат якунида Конимех тумани марказида амалга оширилаётган қурилиш ва ободонлаштириш ишлари доирасида савдо дўкони эгаларининг мулкларига зарар етказилмайди ва улар олиб қўйилмайди, улар ўзларининг ташаббуслари билан ва ўз ҳисобидан савдо дўконларни замон талабларига мос равишда реконструкция қилишади ва ушбу ишларга туман ва вилоят ҳокимликлари уларга амалий ёрдам кўрсатади, дейилади Конимех тумани ҳокими М.Эгамқулов имзолаган маълумотномада.
