Вилоятларда очиладиган юридик факультетларга 50 тадан квота ажратилиши режалаштирилмоқда

Айни пайтда Наманган, Самарқанд ва Термиз давлат университетида юридик факультетлар ташкил этилиши учун ҳаракатлар олиб бориляпти. Янги ўқув йилидан уларнинг ҳар бирига 50 тадан квота ажратилиши назарда тутилмоқда.

Бугун, 11 июнь куни Миллий матбуот марказида ўтказилган матбуот анжуманида Тошкент давлат юридик университети ректори Раҳим Ҳакимов вилоятларда ташкил этилаётган юридик факультетлар қабулига оид янгиликлар ҳақида маълумот берди.

«Айни пайтда Наманган, Самарқанд ва Термиз давлат университетида юридик факультетлар ташкил этилиши учун ҳаракатлар олиб бориляпти. Янги ўқув йилидан уларнинг ҳар бирига 50 тадан квота ажратилиши назарда тутилмоқда», - деди Раҳим Ҳакимов.

Унинг қайд этишича, бу факультетларда фақат битта юриспруденция йўналишида қабул амалга оширилиши режалаштирилмоқда.

Ректор, бундан ташқари, Тошкент давлат юридик университетида режалаштирилаётган қўшма дастурлар ҳақида ҳам маълумот берди.

«Буюк Британия, Россия, Беларусь ва Қозоғистон давлатларининг нуфузли университетлари билан қўшма бакалавр ва магистратура таълим дастурларини жорий этиш бўйича келишувларга эришилди.

Янги ўқув йилидан ҳамкорларимиз билан биргаликда қўшма таълим дастурларига ҳам талабаларни қабул қилиш режа қилиняпти. Ҳамкорлар билан бугунги кунда энг долзарб бўлган рақобат ҳуқуқи, иқтисодий ҳуқуқ, молия ҳуқуқи йўналишларида қўшма дастурлар асосида кадрлар тайёрлаш учун қабул амалга оширилишига эришмоқчимиз», - деб маълумот берди Раҳим Ҳакимов.

Юридик университет ректорининг сўзларига кўра, қўшма дастурлар асосида таҳсил оладиган талабалар икки йил четда, қолган муддатда Ўзбекистонда ўқиш имконига эга бўлишади.