«Мессини қўриқлаш менинг чекимга тушганди». Гочкули Гочкулиев Ўзбекистондаги фаолияти, Стоичков, Шевченко, Ривалдо билан ўйинлари ҳақида 

Осиё футбол конфедерацияси орадан 18 йил ўтиб, Туркманистон чемпиони Осиё чемпионлар лигасида иштирок этишини эълон қилгач, «Turkmanportal» мухбири Тошкентнинг «Пахтакор» ва «Бунёдкор» жамоаси сафида клублар ўртасидаги қитъанинг энг нуфузли турнирида ажойиб ўйинларни ўтказган туркманистонлик таниқли собиқ футболчи Гочкули Гочкулиев билан суҳбатлашди. Туркманистон миллий жамоасининг собиқ сардори интервьюнинг асосий қисмида Ўзбекистондаги фаолиятини эслаб, Мессига қарши учрашув, Ривалдо, Шевченко, Стоичков сингари футболчилар билан ўйинни ёдга олди.

- Гочкули, суҳбатни футболчилик фаолиятингиз давомида эришган ютуқларингиз билан бошласак...

- Туркманистонда Ашхободнинг «Копетдоғ» клуби сафида икки карра чемпионга айланганимдан кейин легионер сифатидаги илк клубим Қозоғистоннинг «Иртиш» жамоаси бўлганди. 2002 йилда эса Ўзбекистоннинг «Пахтакор» клубига ўтиб, Тошкент жамоасида тўрт марта мамлакат чемпионлигини қўлга киритдим. 2006 йилда эса фаолиятимдаги энг муҳим мураббийлардан бири Тачмурод Агамуродов таклифи билан Қозоғистонга қайтиб, «Қайрат» клуби сафида бир йил ўйнадим. 2007 йилда эса яна Ўзбекистонга қайтиб, янги ташкил этилган «Бунёдкор» клуби билан шартнома имзоладим. Тошкентнинг ушбу жамоасида ҳам 2010 йилгача ажойиб дамларни ўтказиб, уч марта чемпион бўлдим.

- Фаолиятингиз давомида болгариялик машҳур ҳужумчи Христо Стоичков, украиналик голеадор Андрей Шевченко, аргентиналик юлдуз Лионель Мессига қарши ўйнагансиз. Тақдир улар билан қачон ва қандай учраштириб қўйган?

- Мақтовни ошириб юбормаганингиз маъқул (кулади). Дарҳақиқат, ушбу юлдузларга қарши майдонга тушиш бахтига муяссар бўлганман. 1998 йилда «Копетдоғ» билан Осиё кубок эгалари кубоги яримфиналида Саудия Арабистонининг «Ан-Наср» клубига рўбарў бўлдик. Ар-Риёдга етиб келганимиздан кейин рақибимиз ўз таркибини кучли легионерлар эвазига кучайтириб олганлигини билдик. Улардан бири 1994 йилги «Олтин тўп» соҳиби, болгар футболи афсонаси Христо Стоичков эди.

Ўйиндан олдин бош мураббийимиз Тачмурод Агамуродов менга кўрсатма бериб, Стоичковга қарши персонал тарзда ўйнашим кераклигини уқтирди. Ўшанда 20 ёшда бўлсам-да, «Олтин тўп» соҳибига қарши ўйиндан олдинги ҳаяжон ҳакамнинг ҳуштагидан кейин йўқолганди. Баҳсда 1:2 ҳисобида мағлубиятга учраган бўлишимизга қарамай, ажойиб жамоага қарши ўйин фойдамизга ишлаганди. Дарвоқе, ўша куни мен қўриқлаган Стоичков гол ура олмаганди.

2004 йилги «Олтин тўп» соҳиби Андрей Шевченкога қарши эса Москвада ўтган Ҳамдўстлик кубогида майдонга тушгандим. Турнир яримфиналида «Копетдоғ» билан Киевнинг «Динамо»сига 0:5 ҳисобида ютқазгандик. Кейинчалик Шевченко «Милан»га ўтиб, катта муваффақиятларга эришганди.

Футбол тарихидаги энг яхши ўйинчилардан бири бўлмиш Лионель Месси билан «Камп Ноу»да учрашгандик. «Бунёдкор» «Барселона» билан ўртоқлик учрашуви ташкил этганди. Энг қизиғи шу куни ҳам Мессини қўриқлаш менинг чекимга тушганди. 1:1 ҳисоби қайд этилган баҳсда Месси гол ура олмаганди (кулади).

- Ўйиндан кейин Месси билан футболка алмашдингизми?

- Лео билан йўқ, аммо «Барселона» марказий ҳимоячиси Карлес Пуйол билан футболкаларимизни ўзаро алмашгандик.

- Бразилия миллий жамоаси билан ЖЧ-2002 ғолиби бўлган футболчи билан ҳам бирга ўйнаган эдингиз...

- Ривалдони назарда тутаяпсизми? Ҳа, «Бунёдкор» сафида 1999 йилги «Олтин тўп» соҳиби, жаҳон чемпиони бўлган бразилиялик ҳужумчи Ривалдо билан бирга тўп суриш бахтига муяссар бўлганман. Айнан у билан бирга ёнма-ён тўп суриб, уч карра Ўзбекистон чемпионига айланган эдик.

- ЖЧ-2010 саралаш босқичи доирасидаги Шимолий Кореяга қарши баҳс ва «Копетдоғ»нинг «Герта» клубига қарши ўйинида 11 метрлик нуқтада адашган эдингиз. Пенальтидан гол ура олмаслик футболчига қандай таъсир қилади?

- Ҳамма ҳам ҳаяжонланади, бундай вазиятларни бошдан кечириш қийин. Албатта, юқоридаги икки ўйиндан кейин ҳам анча вақт ўзимга кела олмагандим. Немис клубига қарши ўртоқлик баҳсида дуранг қайд этилаётганда сўнгги дақиқалардаги пенальтини ура олмаганим қаттиқ таъсир қилган. Жамоадошларим, мураббийлар қўллаб-қувватлашганди.

Корейсларга қарши ўйиндаги омадсизлик кўпроқ ранжитган. Ўша ўйин олдидан «Бунёдкор» сафида жароҳат олганимга қарамай, муҳим баҳсда миллий жамоа футболчиларини қўллаб-қувватлаш учун келгандим. Аммо ватан жамоасини муҳим баҳс кутиб турганда оғриқларга қарамай, якка тартибда машғулотларда қатнашдим. Жамоага ёрдамим кераклигини тушуниб, жароҳатимга қарамай мураббийлардан асосий таркибда туширишларини сўрадим. Жамоанинг штатли пенальтичиси эканлигим учун Шимолий Корея билан оғир ўйиндаги 11 метрлик зарбани амалга оширишим керак эди. Аммо оғриқлар таъсирини ўтказмай қолмади – пенальтидан фойдалана олмадим. Якунда муҳим ўйин 0:0 ҳисобида тугади. Учрашувдан кейин ўзимни айбдордек ҳис қилганман. Бош мураббий Раҳим Қурбонмемедов ва бошқа футболчилар қийин паллада қўллаб-қувватлашганди.

- Фаолиятида ютуқларга эришган футболчи сифатида ёшларга қандай маслаҳатлар бера оласиз?

- Ҳаётда ҳам, спортдаги фаолиятларида ҳам энг аввало қатъий интизомга амал қилишлари шарт. Сабаби улар доим эътиборда бўлишади, кўпчилик учун ўрнак ҳисобланишади. Айнан ушбу масъулиятни ҳам унутмасликлари лозим.

Усмон Ибодов таржимаси.

Маълумотнома:

Гочкули Гочкулиев

Туғилган жойи: Туркманистон, Балканобод.

Туғилган санаси: 1977 йил, 26 май.

Футболчилик фаолияти:

«Аркач» (Туркманистон) - 1994 йил

«Небитчи» - 1995

«Безмеин» - 1996

«Копетдоғ» - 1997–2001

«Иртиш» (Қозоғистон) – 2002

«Пахтакор» (Ўзбекистон) – 2002-2005

«Қайрат» (Қозоғистон) – 2006

«Бунёдкор» (Ўзбекистон) – 2007-2010

«Гара Олтин» (Туркманистон) – 2011-2012 йил.

Мураббийлик фаолияти:

«Олтин асир» (Туркманистон) клуби мураббийи.