Равшан Эрматов 10 минг қадам юрганлик учун 3 минг сўм тўланиши ҳақида гапирди

«Бизнинг кўрсаткичларимизни оладиган бўлсак, Европа ва соғлом турмуш тарзини аввалроқ йўлга қўйган давлатлардан анча орқада эканимиз кўзга ташланди. Шунинг учун ҳам юриш, югуриш, стритбол, бадминтон, мини футбол, волейбол, баскетбол каби ўйинлар орқали биз аҳолини спортга жалб қилмоқчимиз.

Албатта, бошланишида уларни спортга қизиқтириб, уйларидан, ишхоналаридан чиқариб спорт тадбирларини ташкил қиладиган бўлсак, 1–2 ойдан кейин автоматик равишда соғлом турмуш тарзи уларнинг ҳар кун эътибор қиладиган ишларига айланиб қолади.

Ўзимиздан мисол келтирадиган бўлсам, 2–3 кун спорт билан шуғулланмасак, нимадир етишмаётгандек туюлади. Аҳолимиз ҳам шундай ҳолатда бўлса, ўйлайманки, ҳар қандай касалликнинг олдини спорт орқали олиш, спорт орқали енгиш мумкин бўлади», – деди вазир ўринбосари.

Равшан Эрматов кунига 10 минг қадам юрган фуқаро моддий рағбатлантирилиши ғоясига муносабат билдирди.

«10 минг қадам юрган шахснинг ҳисоб рақамига 3 минг сўм ўтказилиши бир стимулдек кўринса-да, лекин менинг ишончим комилки, бунча қадамларни бизнинг аҳолимиз пул учун эмас, ўз соғлиғини тиклаш учун, қандайдир касалликларга учрамаслик учун ташлайди.

Тўғрисини айтганда, биз халқаро тажрибада бундай ёндашувни кўрмаганмиз, бу – ўзбек модели ва ўзбекистонликлар ўз моделини тарғибот қиляпти.

Яқинда ўқидик, бу янгилик Буюк Британиянинг The Guardian нашрида ҳам чоп этилди. Ўйлайманки, соғлом турмуш тарзи ва спортга бундай ёндашиш жуда катта натижаларни яқин орада беради», – деди Равшан Эрматов.

• Октябрь ойида имзоланган президент фармонига биноан, бир суткада 10 минг қадам юрган фуқароларга 3 минг сўм тўланадиган механизм жорий этилади. Бунинг учун «Соғлом турмуш тарзи» номли платформа 2021 йил 1 мартга қадар ишлаб чиқилади.
• Ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга 1 млн сўм қўшимча равишда платформадаги электрон ҳамёнига ўтказилади.