“Кафолат суғурта компанияси” АЖ 24 ёшда: тажриба, амалиёт ва синалган ишонч

Бозор иқтисодиёти шароитида суғурта соҳаси иқтисодий ривожланишнинг муҳим омилларидан бири ҳисобланади ва аксинча иқтисодий барқарорлик суғурта соҳаси ривожланишининг негизи саналади.

Мустақилликнинг илк йилларида иқтисодий ислоҳотларнинг ривожланиш босқичида суғурта соҳасида ҳам бозор механизмларига асосланган инфратузилма шакллана бошлади. Республикамизда узоқ йиллар давлат суғуртаси амал қилган бўлса, бозор механизмларининг шаклланиши суғурта соҳаси олдига ҳам кечиктириб бўлмас ислоҳотларни амалга оширишни долзарб вазифа сифатида белгилаб берди.

Бозор тамойилларига ва соғлом рақобатга асосланган суғурта хизматлари шаклланиши бу йўналишда суғурта хизматларини таклиф этувчи суғурта ташкилотларининг вужудга келиши билан боғлиқдир.

1997 йилнинг 14 мартида Вазирлар Маҳкамасининг 144-сонли қарорига асосан “Кафолат суғурта компания”си ташкил этилди. Компания дастлаб иш бошлаган вақтда устав капитали 500 млн сўмдан иборат бўлиб, 48 та минтақавий тармоғи мавжуд эди.

Компания мана 24 йилдирки, суғурта бозорининг профессионал иштирокчиси сифатида мамлакатимизда олиб борилаётган ислоҳотлар ижросида ўзининг фаоллигини кўрсатиб келмоқда. Жамият филиаллар тармоғи бўйича жуда кенг географик нуқтага эга бўлишига қарамай аҳоли ва ташкилотларга янада яқинлашиш, уларга қулай суғурта хизматларини кўрсатиш мақсадида йилдан йилга янги суғурта марказларини очмоқда. Бугунги кунга келиб филиаллар, суғурта марказлари ва бўлинмалар сони 215 тани, сотув шохобчалари сони 400 дан зиёдни ташкил этади.

Мамлакатимизда 2016 йил охиридан миллий иқтисодиётимизда жадал ривожланишни ўз ичига олган трансформация жараёни бошланди. Иқтисодиётнинг барча тармоқлари хизмат кўрсатишнинг янги тизимига инновация, мотивацион ёндашув ва аниқ мақсадли режалар асосида ёндашишни бошлади. Мазкур жараёнда 2017 йилнинг 9 октябрида Ўзбекистон Республикаси Президентининг ПҚ-3317-сонли “Кафолат суғурта компанияси” АЖ фаолиятини такомиллаштириш чора-тадбирлари тўғрисида”ги қарори қабул қилиниб, компаниянинг асосий ривожланиш йўналишлари белгилаб берилди.

Бугунги кунда Ўзбекистон суғурта бозорида 40 га яқин суғурта компанияси фаолият олиб бормоқда. Ҳар йили 3 та, 4 та янги суғурта компаниялари ўз фаолиятини бошламоқда. Бундай рақобат шароитида компаниянинг бозордаги ўз ўрнини сақлаб қолиши ва доимий ривожланиб бориши жуда мураккаб бўлиб, компаниядан ҳар томонлама ўйланган ва аниқ режаларга асосланган стратегик йўналишларни белгилашни тақозо этади.

“Кафолат суғурта” компаниясининг тарихи давомида доимий кучли тўртликдан жой олишида биринчи навбатда профессионал мутахассислар жамоаси, энг катта минтақавий тармоқ, инновацияга асосланган суғурта хизматлари, шаклланган компания бренди, тезкор тўлов ва мустаҳкам халқаро алоқа сабаб бўлмоқда.

Ҳозирда компания томонидан аҳоли ҳамда юридик шахсларга ҳар томонлама қулай, пасайтирувчи коэффициентларни ўз ичига олган ва ҳар томоннинг манфаатларига мос келувчи суғурта хизматлари таклиф этилмоқда. Чет эл тажрибаси ва Ўзбекистон суғурта бозорида шаклланган тажрибалардан фойдаланиб ҳамда аҳоли ва хўжалик юритувчи субъектларнинг эҳтиёжларидан ва бозор талабидан келиб чиққан ҳолда янги замонавий суғурта турлари ишлаб чиқилмоқда. Шу билан бирга, мавжуд суғурта турлари доимий равишда такомиллаштириб борилмоқда.

Ягона стандартлар ва универсал суғурта технологияларини қўллаш, бошқарувнинг ягона корпоратив стандартлари бўйича ишлаш, молиявий барқарорлик эвазига компания рейтинги халқаро Fitch Ratings стандартлар бўйича узоқ йиллардан буён «BВ-» (барқарор) рейтинги билан баҳоланиб келинмоқда. 

Миллий стандартлар бўйича «SAIPRO» ахборот рейтинг агентлиги “Кафолат суғурта компанияси” АЖ фаолиятини «uzA++» (энг юқори молиявий кўрсаткич) рейтинги билан баҳолаган.

Компания “International Underwriting Association of London” уюшмасининг Ўрта Осиёда иккитадан бири, Ўзбекистонда ягона аъзоси бўлган суғурта ташкилоти ҳисобланади.

ISO 9001:2015 халқаро стандарти бўйича сифат менежменти тизимига эга. Ҳар йили молиявий ҳисоботларнинг халқаро стандартлари бўйича аудит олиб борилади.

 Ўзбекистон иқтисодиётининг ривожланиши, кенг кўламли инвестицион лойиҳаларнинг жорий этилиши ўз-ўзидан мустаҳкам суғурта ҳимоясини талаб этади. Йирик суғурта объектлари билан ишлашда суғуртанинг умуминтеграция жараёнларидан фойдаланиш асосий ўрин тутади.

Компания томонидан HDI Global (Германия), CHUBB, Swiss Re (Швейцария), АХА Global Healthcare Pte Ltd (Франция), BMI (Каймон ороллари), People’s Insurance Company of China (Хитой), Hyudai Insurance, Samsung Insurance (Корея), Russian Re, Россия миллий қайта суғурта компанияси, СОГАЗ ва Ингосстрах (Россия), Willis Towers Watson, АОN ва DIG Pls (Буюк Британия) ва бошқа қайта суғурта компаниялари ва брокерлари билан тузилган ҳамкорлик шартномалари асосида дунё бўйлаб жойлашган йирик 1000 дан ортиқ объектлар қайта суғуртага қабул қилинди.

Компания 2019 йилда 3,4 млн АҚШ доллари экспорт хизматини таъминлаган бўлса, 2020 йилда бутун дунёда пандемия муҳити ҳукм суришига қарамай ушбу кўрсаткич 5,2 млн АҚШ долларини ташкил этди.

Шу билан бирга, рискларни бошқариш, суғурта хизматларининг мижоз ва бозор талабига мослиги, шаффофлиги, ягона стандартлар асосида хизмат кўрсатиш тизими шаклланиши ҳам компанияда суғурта хизматлари кўрсатишнинг ижобий динамикасини белгилаб бермоқда.

2020 йил мобайнида компания 663 мингга яқин суғурта шартномаларини имзолаб, 87,8 трлн сўм миқдорида суғурта жавобгарлигини олган. Олинган жавобгарлик бўйича 7333 та суғурта даъволари кўриб чиқилиб, 38,0 млрд сўмдан ортиқ суғурта тўловлари амалга оширилган.

2020 йилда кичик бизнес ва хусусий тадбиркорлик субъектларининг суғуртавий ҳимоясини таъминлаш борасида 38,5 мингдан ортиқ субъектларга 5,5 трлн сўмдан ортиқ суғурта хизматлари кўрсатилди. 15 355 та кичик бизнес субъектларига тадбиркорлик фаолиятларини бир маромда давом эттиришларини қўллаб-қувватлаш мақсадида олаётган кредитлари қайтарилиши бўйича 928,7 млрд сўмлик суғурта хизматлари тақдим этилди.

Миллий товар ва хизматлар экспортчиларини бугунги кунда энг қийнайдиган саволлардан бири улар жўнатаётган мол-мулкнинг хорижий ҳамкорга тўлиқ бус-бутун етиб бориши ва хорижий ҳамкор томонидан экспорт шартномасига асосан маблағнинг ўз вақтида тўлаб берилишидир. Бу борада ўтган йилда компания томонидан асосан Тошкент шаҳри ва вилояти, Самарқанд, Андижон, Бухоро, Фарғона ва Жиззах вилоятлари шунингдек Қорақалпоғистон Республикасида фаолият юритувчи экспортчиларнинг 1,2 трлн сўмлик рисклари суғуртавий ҳимояга олинди.

Яна бир муҳим йўналиш, компания томонидан аҳолининг, жумладан ёшларнинг суғуртавий ҳимоясини таъминлашдир. Биргина 2020 йилнинг ўзида аҳолига 14,3 трлн сўмлик 60 дан ортиқ суғурта турлари бўйича хизмат кўрсатилиб, улар билан 522,1 мингдан ортиқ суғурта шартномалари имзоланган. Юзага келган суғурта ҳодисалари бўйича 6 035 та ҳолатда 22,9 млрд сўмдан ортиқ суғурта қопламалари тўлаб берилди.

Ўтган йилнинг баҳор ойларида Бухоро ва Сирдарё вилоятларида содир бўлган фавқулодда ҳолатлар суғурта компаниялари қатори, “Кафолат суғурта компанияси” АЖ олдига ҳам бирламчи вазифани белгилаб берди. Зарар кўрган аҳолига ва тадбиркорлик субъектларига моддий ва маънавий ёрдам кўрсатиш мақсадида тезкор ишчи гуруҳи талафот содир бўлган куниёқ Сирдарё ҳамда Бухоро вилоятларига етиб борди.

Сирдарёда талафот натижасида компания томонидан суғурта қилинган объектларга зарар етгани аниқланиб, 43 та жабр кўрган мижозларга 257,0млн сўм суғурта қопламалари тўлаб берилди.

Бухоро вилоятида 27 апрель куни юзага келган кучли шамол ва ёғингарчилик натижасида 31 та зарар кўрган объектларга 340,0 млн сўм миқдорида суғурта қопламалари амалга оширилди.

Қайд этиш лозимки, компанияда ёшлар масаласига алоҳида эътибор қаратилади. Жумладан, ёш кадрларни кўпайтириш, уларнинг касбий салоҳияти ва малакасини ошириш, олий таълим муассасаларида таълим олиши учун шароит яратиш борасида тизимли ишлар амалга оширилмоқда.

2019 йил 2 августда Ўзбекистон Республикаси Президентининг «Ўзбекистон Республикасининг суғурта бозорини ислоҳ қилиш ва унинг жадал ривожланишини таъминлаш чора-тадбирлари тўғрисида»ги Қарори имзоланди. Ушбу ҳужжатга мувофиқ компанияда ишлаётган ўрта махсус маълумотга эга бўлган 23 нафар ходим олий таълим муассасасига тавсиянома асосида ўқишга қабул қилинди.

Бундан ташқари, юқоридаги Президент Қарорининг бажарилишини таъминлаш мақсадида “Кафолат суғурта компанияси” АЖ вакиллари Буюк Британиянинг Лондон шаҳридаги Chartered Insurance Institute (CII) билан меморандум имзолаб, 2020 йил июль ойида Тошкент шаҳридаги Халқаро Вестминстер Университети ўқитувчилари иштирокида Ўзбекистон суғурта компанияларининг 20 нафар мутахассислари онлайн режимида General Insurance (Умумий суғурта) йўналишида дарс ўтдилар.

Компаниянинг бош мақсади – мижозлар олдидаги мажбуриятларни тўлиқ ва сифатли бажариш ва бу орқали ижтимоий йўналтирилган Ўзбекистон иқтисодиётига муносиб ҳисса қўшишдан иборат.

Реклама ҳуқуқи асосида