Президент Шавкат Мирзиёев 2019 йил июнь ойида Тошкент вилоятига ташриф буюрган эди. Ташриф давомида вилоят раҳбарларига Қуйи Чирчиқ тумани Беруний маҳалласида бўш турган, туман ҳокимлиги балансидаги уч қаватли бинони қайта ихтисослаштирган ҳолда капитал таъмирлаб, кам таъминланган ва чин етим фуқароларга уй-жой сифатида бериш вазифаси топширилган.
Тадбиркорнинг сўзларига кўра, давлат раҳбарининг ушбу топшириғи Президент администрацияси раҳбари тасдиқлаган «йўл харитаси»га ҳам киритилган. Лойиҳа қиймати 5 млрд сўм бўлган. Унинг 2,5 млрд сўм қисми туман ҳокимлиги (маҳаллий бюджет) ажратадиган субсидия, қолган қисми эса турар жой эгаларининг маблағлари ҳисобидан қопланиши айтилган.
Дастлаб бинони таъмирлаш ишлари «Qurilish Tv Max» МЧЖга юклатилади. Лекин номаълум сабабларга кўра, бу корхона таъмирлашни охиригача етказмайди.
Шундан сўнг бинони таъмирлаш бўйича «Беруний» МФЙ ва «Минор таъмир қурилиш» МЧЖ ўртасида шартнома тузилади. «Минор таъмир қурилиш» 1 млрд 300 млн сўмлик ишни бажаради.
Ҳокимлик пул бермагани сабабли ҳамма сарсон - тадбиркор
Корхона раҳбарининг сўзларига кўра, ҳокимлик бинони таъмирлаш ишларига 50 фоиз субсидия ажратиши, қолган 50 фоизини эса фуқароларнинг ўзлари тўлаши керак бўлган. Лекин шу вақтгача ҳокимлик фақатгина 300 млн сўм маблағ тўлаб берган. Қолган маблағ ўтказилмагани ортидан кўплаб муаммолар вужудга келмоқда.
«Мана шу таъмирталаб уч қаватли бинонинг якуний ишларини тугата олмаяпмиз. Сабаби ҳокимлик пул бермаяпти. Натижада фуқаролар ҳам сарсон, ишчилар ҳам ойликларини олиша олмаяпти.
Бу уйлар кам таъминланган оилалар ва чин етимларга берилиши керак эди. Биздан олдинги тадбиркорларга 1 млрд сўмдан зиёд пул ўтказиб берилган. Лекин иш охиригача якунланмай чала ташлаб кетилган. 1 млрд сўмлик иш қилинмаган. Биз шу вақтгача 2,7 млрд сўмлик ишларни бажарган бўлсак ҳам пул ўтказиб берилмаяпти. Ҳокимлик шу вақтгача фақат 300 млн сўм пул берган, холос.
