Расул Кушербаев ўз Телеграм каналида йўллардаги қоидабузарликларни суратга олиб ДЙХҲБга жўнатувчилар ҳақида пост қолдирди. Видеомурожаат шаклида қилинган пост остида депутат аввал «Хусусий радар [ўрнатиб] ҳамда қоидабузарликни расмга олиб, сотиб пул ишлаётганлар ҳақида: улар бугун 10 минг сўм учун одамларни сотса, эртага 100 минг сўм учун Ватанини ҳам сотиши мумкин», дея изоҳ қолдирди.
Сал ўтмай изоҳ «Қоидабузарликни расмга олиб пул ишлаётганлар ҳақида: улар бугун 10 минг сўм учун одамларни сотса, эртага 100 минг сўм учун Ватанини ҳам сотиши мумкин», деб ўзгартирди.
Яна бироздан сўнг эса постни ўчирди. Лекин видеомурожаат вирусли видеога айланиб, телеграмдаги турли каналларда айлана бошлади.
Ўзи, қоидабузарликларни суратга олиб, Давлат йўл ҳаракати хавфсизлиги хизматига жўнатиш масаласида сўнгги вақтларда жамият икки фронтга бўлинган эди. Кушербаевнинг гапини маъқуллаганлар ҳам, унга қарши чиққанлар ва уни популистликда айблаганлар ҳам.
Ҳа, бошдан-бош кимлардир бу ишни оқлаяпти, яна кимлардир (асосан, ҳайдовчилар) мутлақо ёқламаяпти. Бу иш мусулмончиликка тўғри келмайди, деган гаплар рўкач қилинмоқда.
Мен ҳам бу борада ўзимнинг шахсий субъектив фикрларимни ҳамда айрим таклифларимни беришга жазм қилдим.
Шу ўринда, ўзим ҳақимда: 2006 йилдан буён машина ҳайдайман. Имкон қадар қоида бузмасликка ҳаракат қиламан. Тўғри, йилда 1-2 марта жарима тўлайман, бусиз иложсиз. Вилоятларда юраман, асосан, нотаниш йўлларда тезликни ошириб, радарга тушаман. Умуман, билиб-билмай қилган бирор қоидабузарлигим учун тўхтатилиб, жаримага тортилсам — ҳушёр тортаман, ўша қоидабузарликни ҳеч қачон қайта қилмайман, ўша жойда доимо ҳушёр бўламан. Ўйлайманки, кўпчиликда шундай.
Йўллардаги рақамлар нимадан сўзлайди?
Ички ишлар вазирлиги Йўл ҳаракати хавфсизлиги бош бошқармаси маълумотларига кўра, карантин жорий этилиб, айрим ойларда республика бўйлаб автомобиллар ҳаракати чекланган 2020 йилнинг январ-сентябр ойларида Ўзбекистонда қарийб 4300та ЙТҲ содир бўлган. Унда 3886 нафар одам жароҳатланган, 1293 нафар инсон ҳалок бўлган. 2019 йилнинг уч чорагида бу кўрсаткич 4804та ЙТҲ, 5058 нафар жароҳатланганлар ва 1398 нафар ҳалок бўлганларни ташкил этганди.
