АҚШ разведкаси Уҳан лабораториясида ўрганилган вируслар ҳақида махфий ахборотни қўлга киритди - CNN

АҚШ разведкаси Уҳан вирусология институтида ўрганилган вируслар намуналари ҳақидаги маълумотларни қўлга киритди ва ҳозирда уларни таҳлил қилиш билан шуғулланмоқда. Бу ҳақда CNN телеканали вазиятдан хабардор кўплаб манбаларга таяниб хабар берди. 

Телеканал разведка ушбу маълумотларни қандай қўлга киритганини аниқлай олмаган. Манбаларнинг таъкидлашича, бундай турдаги генетик ахборотни қайта ишловчи машиналар одатда булутли серверлар билан боғланган ва бу ахборотни бузиб кириш орқали олишга имкон беради.

АҚШ разведка хизматлари вирус намуналаридан олинган генетик чизмалар каталогини қўлга киритган. Таъкидланишича, айнан шу намуналар коронавирус тарқалишига сабаб бўлган бўлиши мумкин.

Манбаларга кўра, олинган маълумотларни тўғри қайта ишлаш учун АҚШ Энергетика вазирлиги лабораторияларидаги суперкомпьютерлар талаб этилади. АҚШ янги ахборот вирус ҳайвонлардан одамларга қандай юққанига жавоб топишда ёрдам беришига умид қилмоқда.

Бироқ разведка ахборотни қайта ишлашда техник муаммолардан ташқари, маълумотларни расшифровка қила оладиган олимларни топиш билан боғлиқ қийинчиликларга ҳам дуч келган. Бундай олимлардан Хитой тилининг мандарин шевасини билиш талаб этилади, чунки маълумотлар айнан шу шевада ёзилган.

Май ойида АҚШ президенти Жо Байден махсус хизматларга коронавирус келиб чиқишини аниқлаш бўйича саъй-ҳаракатларни икки карра кучайтириш ва натижалар ҳақида 90 кун ичида ҳисобот беришни буюрган. Оқ уйда разведка коронавирус ҳақида аввал ўрганилмаган маълумотларга эгалиги ва вирус Уҳандаги лабораториядан чиқиб кетгани эҳтимолини текшириш учун ўта кучли компьютерларни қўллашини маълум қилган.

Аввалроқ АҚШда коронавирус пандемиясининг сабаблари бўйича ҳисоботнинг 3-қисми тақдим этилган. Унда вирус Уҳандаги лабораториядан чиқиб кетгани версияси фойдасига маълумотлар келтирилган. Ҳисобот муаллифларининг фикрича, коронавирус юқтириш билан боғлиқ илк ҳолатлар 2019 йил ноябридан аввалроқ юз берган, Уҳандаги лаборатория эса коронавируснинг юқумлилигини ошириш ва унга қарши профилактик чораларни ўрганиш мақсадида вирус мутациялари билан тадқиқотлар ўтказган.