«Ташаббусли бюджет» жараёнининг 2-босқич якунларига кўра, жами 41 125та таклиф келиб тушган, шундан 50 фоизи тасдиқланган. Молия вазирлиги масъулига кўра, аҳолидан энг кўп йўлларни таъмирлашга оид таклифлар келиб тушган, «аҳоли ўзи ҳал қиладиган маблағ» 400 млрд сўмга етказилиши кутилмоқда. Овоз бериш жараёни 2 сентябрга қадар давом этади.
«Ташаббусли бюджет» жараёнининг 2-босқич якунларига кўра, жами 41 125та таклиф келиб тушди. Бу ҳақда Молия вазирлиги хабар бермоқда.
Таклифларни кўриб чиқиш жараёнида 19 289таси белгиланган мезонларга мос келмагани сабабли ишчи гуруҳ томонидан рад этилган бўлса, қолган 21 832та таклиф белгиланган тартибда кўриб чиқилиб, 3-босқич, яъни овоз бериш жараёнига ўтказилди.
Молия вазирлиги департаменти директори Шерзод Муҳамедовнинг сўзларига кўра, таклифлар маъқулланиши учун 2та мезонга тўғри келиши керак эди:
- Таклиф суммаси 1 млрд сўмдан ошмаслиги;
- Шахсий манфаатга қаратилган бўлмаслиги.
«Шу мезонларга тўғри келадиган таклифлар 21 832тани ташкил этди. Навбатдаги босқичда ташаббуслар овоз йиғиши керак бўлади. Овоз бериш 1 сентябрга қадар давом этади. Бунинг учун «Очиқ бюджет» платформасига кириб, ўз ҳудудидан қолдирилган ташаббусга лайк босиш ёки овоз бериш керак. Ташаббусни Facebook, Telegram’га улашиш имкони ҳам бор. 13 августдан бошлаб эса 20 кун давомида таклифларга овоз бериш жараёни ўтказилади», дейди у.
«Таклифлар 40 баробар ўсди, буни кутмаган эдик»
Блогер Хушнуд Худойбердиевнинг «Ташаббусли бюджет» мавзусида ўтказган овозли чатида молия вазири ўринбосари Aҳадбек Ҳайдаров аҳолидан келиб тушган таклифлар 41 мингдан зиёдни ташкил этганига тўхталди.
«Лойиҳа бошланган пайтда келиб тушган таклифлар сони 1100та эди. Бугунги кунда уларнинг сони 41 125тага етди. Таклифлар суммаси 13 трлн сўмдан ошиб кетди. Биргаликда ҳаракатларимиз ортидан аҳоли «Ташаббусли бюджет» платформасида таклиф қолдиришда фаол бўлди.
Қизиқ маълумот шуки, одамлардан энг кўп келиб тушаётган таклифлар, асосан, ички йўлларни таъмирлашга йўналтирилган, таклифлар аҳолини қийнаб келаётган муаммоларни кўрсатиб берди.
Ташаббуслар кесимида ички йўлларни таъмирлаш (1 150), ичимлик сув (552), ижтимоий соҳа объектларини таъмирлашни (1245) ташкил этди», дейди у.
Шунингдек, вазир ўринбосари 3-чорак якунида ташаббусли бюджет учун ажратилган маблағ 400 млрд сўмга етказилишини билдирди.
«Жорий йилнинг бошида 157 млрд сўм аҳолига ташаббусли бюджет учун ажратилганди. Ҳозир бу маблағ 286 млрд сўмни ташкил қилмоқда.
Республика бюджетидан қўшимча 93 млрд сўм маблағ берилди, бундан ташқари, маҳаллий бюджетларнинг қўшимча манбаларидан 10 фоиз йўналтирилар эди, энди бу миқдор 30 фоизга етказилди. Бу маблағ 3-чорак якунлари бўйича 400 млрд сўмга яқинлашиши кўзда тутилмоқда. Йил охиригача маблағлар яна орттирилишини кутяпмиз», деди у.
Ҳайдаров «ташаббусли бюджет» платформасини ишга туширишдаги заруратга ҳам тўхталиб ўтди.
«Aнъанавий бюджет давлат органлари, ҳукумат томонидан тайёрланади ва ҳукуматга киритилиб Олий Мажлис томонидан тасдиқланади. Маҳаллий бюджетлар маҳаллий давлат органлари томонидан тайёрланиб, туман ва шаҳар миқёсидаги депутатлар томонидан тасдиқланади.
Жаҳон тажрибаси шуни кўрсатадики, бу бюджет кўпинча маҳалла, пастки даражада аҳолини қийнаб келаётган масалаларни қамраб олмайди. Маҳаллий бюджетларда маълум маблағлар кўзда тутилса-да, ўша маблағлар шу ҳудуддаги аҳоли фикрлари асосида шакллантирилиши керак деган хулосага келдик.Дейлик, маҳаллий бюджетлар даромадларининг ортиқча бажарилган қисмини бюджетдан 10 млрд сўм кўзда тутилган бўлса, 1 млрд ортиқча даромад қиладиган бўлса, халқнинг таклифлари асосида шакллантириш бўйича ўйладик. Бироқ даромаддан оширилган маблағлар унчалик катта эмас. Aгар 2019-2020 йилга қарасак, икки йилда ўртача 245 млрд сўм маблағ ажратилган.
Эндидан шундай тартиб ўрнатилдики, маҳаллий бюджетларнинг 5 фоизи фуқаролар томонидан билдирилган таклифлар асосида шакллантирилади», деди вазир ўринбосари.
Маълумот учун, Молия вазирлиги июль ойида янгиланган «Очиқ бюджет» порталини («Openbudget.uz») ишга туширган, у ерда давлат бюджети, давлат қарзи ҳақида маълумот эълон қилинади ва «Ташаббусли бюджет» бўлими яратилган.
Фуқаролар маҳалла, аҳоли пунктлари ва тумандаги муаммоларни ҳал қилиш бўйича лойиҳалари билан «Openbudget.uz» платформаси орқали мурожаат қилишган. Масалан, шаҳар инфратузилмасини яхшилаш, хиёбонлар, болалар ва спорт майдончалари қуриш, экологик вазият ва сув таъминотини яхшилаш, кўча чироқларини таъмирлаш ва ўрнатиш, мактабларни таъмирлаш ва жиҳозлаш ва ҳоказо.
2 сентябрга қадар овоз бериш жараёни бўлиб ўтади. Фуқаролар тасдиқдан ўтган таклифларга овоз бериш орқали бюджетнинг бир қисмини тўғри сарфлашда иштирок этиши мумкин.
Бунинг учун сайтга кириб, сараланган таклифларга овоз берилади. Ташаббуслар рўйхатида туман ва шаҳар кесимида фильтр қилиш имкони бор. Яъни ўзингиз яшаётган ҳудуд учун берилган таклифларни кўриб, овоз беришингиз мумкин.
Масалан, Чилонзор туманида кўприкка лифт ўрнатиш масаласида таклиф берилган:
Порталда рўйхатдан ўтмасдан туриб ҳам СМС орқали овоз бериш имконияти яратилган. Бунинг учун маъқул келган таклифни танлаш ва овоз бермоқ тугмасини босиш керак бўлади:
1) Телефон рақамини киритиш сўралади;
2) Телефонга СМС келади. Ундаги код киритилади ва овоз ҳисобга ўтади.
Овоз бериш натижалари асосида тегишли туман (шаҳар) ҳокимининг ғолиб лойиҳаларни молиялаштириш бўйича қарори лойиҳаси тайёрланади. Бир ҳафта ичида ушбу лойиҳалар Халқ депутатлари кенгашига киритилади.
