Меркель Бундестагда канцлер сифатида охирги марта чиқиш қилди

Германия канцлери лавозимини тарк этаётган Ангела Меркель мамлакат парламенти – Бундестаг олдида хайрлашув нутқи билан чиқди. У ўз нутқи давомида 26 сентябрда мамлакатда ўтадиган парламент сайловларида партиядоши, Христиан-демократик ва Христиан-ижтимоий иттифоқлар блокидан номзод Армин Лашет номзодини қўллаб-қувватлашга чақирди.

“Фуқароларда бир неча кундан кейин танлов бўлади. Кейинги ҳукуматда ким бўлиши барибир эмас. Бу “сўллар” қўллаб-қувватлашини эътиборга олувчи социал-демократлар ва “Яшиллар” ҳукумати бўлади ёки ҳукуматда босиқ позицияларда бизни келажакка етаклайдиган Армин Лашет бошчилигидаги Христиан-демократик ва Христиан-ижтимоий иттифоқлар блоки бўлади”, деб айтган Меркель.

Канцлернинг бу сўзлари социал-демократлар, “Яшиллар” ва “сўллар” вакиллари томонидан танқидий қабул қилинган. “Мен шунчаки ҳақиқатни гапирмоқдаман”, деб жавоб қилган Меркель.

Канцлернинг нутқи 15 дақиқа давом этган. У ўз нутқида, шунингдек, фуқароларни коронавирусга қарши эмланишга чақирган ва иқлим ўзгариши, террорчилик ва киберҳужумларга қарши курашиш муҳимлигини яна бир бор эслатиб ўтган.

26 сентябрда Германияда Бундестагга сайловлар бўлиб ўтади. Узоқ вақт давомида ижтимоий сўровномалар сайловларда ҳукмрон Христиан-демократик ва Христиан-ижтимоий иттифоқлар блоки ғалаба қозонишини кўрсатиб келган. Бироқ Германияда июлда юз берган тошқинлардан кейин ҳукмрон блок рейтинги кескин пастлаган, унинг асосий рақиби - социал-демократларнинг ғалаба қозонишга имконияти эса ошган.

Аввалроқ Ангела Меркель Германия канцлери лавозимини бошқа эгалламаслигини маълум қилганди.