Олий суд 16 феврал воқеаларида айбланган собиқ божхоначиларга чиқарилган оқлов ажримини бекор қилди

Ишни Олий судда кўриш бир ойдан ошиқ танаффусдан сўнг давом эттирилди. Олий суд жиноят ишлари бўйича судлов ҳайъати томонидан 30 сентябрь куни кўрилиши бошланган жиноят иши бўйича 11 ноябрь куни кассация ажрими чиқарилди.

Олий суд ажрими билан Тошкент вилояти прокурори протести қисман қаноатлантирилиб, Тошкент вилоят судининг апелляция ҳайъати томонидан 2021 йил 24 июль куни чиқарилган оқлов ажрими бекор қилинди ҳамда иш вилоят судида апелляция инстанциясида янгидан кўриш учун юборилди.

Судлов ҳайъати оқлов ажримини бекор қилишга асос сифатида вилоят судида ишни кўриш чоғида айрим процессуал талабларга риоя қилинмаганини келтирди. Шу билан бирга, суд собиқ божхоначиларнинг айблилик масаласига тўхталмаганини билдирди.

Эслатиб ўтамиз, бундан 22 йил аввал Тошкентда содир бўлган террорчилик актларидан сўнг жиноий жавобгарликка тортилган бир неча собиқ божхоначилар 2021 йилда оқланган эди. Оқлов ҳукмига нисбатан Тошкент вилояти прокурори протест киритгач, иш Олий судда қайта кўрилди.