Акром Раҳмонқулов устидан суд ишини кўришда очиқликка оид фармон талаби бажарилмади
Қонунчиликка биноан, давлат хизматчиси касбий фаолияти сабаб суднинг қора курсисида ўтирган бўлса, бу суд мажлиси интернетда жонли эфирга узатилиши керак. Миллиардлаб бюджет пулларини талон-торож қилган Акром Раҳмонқулов ишида бундай бўлгани йўқ. Олий суд ва МТРК бир-бирини айбламоқда.

Фото: Жиззах вилояти ҳокимлиги
29 декабрь куни Тошкент вилоят судида Жиззах вилояти ҳокимининг собиқ ўринбосари Акром Раҳмонқулов ва бошқалар устидан очилган жиноят иши бўйича сўнгги суд мажлиси бўлиб ўтди.
Сўнгги йиллардаги энг йирик коррупциявий ишлардан бирида собиқ амалдор 7,5 йилга қамалган бўлса, қолган 26 нафар судланувчига озодликдан маҳрум қилиш билан боғлиқ бўлмаган жазолар қўлланди.
Мазкур суд жараёни очиқликка оид президент фармонига зид равишда интернет ва телевидение орқали жонли эфирга узатилмади.
Фармоннинг 14-бандига асосан, Ўзбекистон Миллий телерадиокомпанияси ва Коррупцияга қарши курашиш агентлиги манфаатдор давлат органлари ва ташкилотлар билан биргаликда 2021 йил 1 декабрдан бошлаб давлат хизматчиларининг касбий фаолияти билан боғлиқ ҳуқуқбузарликларга оид ишлар бўйича суд мажлисларини телеканаллар ва интернет тармоғи орқали жонли эфирга узатилишини таъминлаши керак эди.
Лекин деярли барча ОАВ вакиллари суд жараёни бўлиб ўтганидан фақатгина Олий суд баёнотидан кейин хабар топди.
Kun.uz билан суҳбатлашган Олий суд матбуот котиби Азиз Обидов собиқ мансабдор Акром Раҳмонқуловнинг иши очиқ суд мажлисида кўрилганини айтди.
“Суд очиқ ўтди, биз уни жонли эфирга узатилишига қарши эмасмиз. Лекин бизда бундай имконият йўқ. Фармонда асосий ижрочи сифатида МТРК келтирилган. Улар келиб қилиши керак эди…
Суд қачон бўлишини қайсидир ОАВ вакили сўраган эди, лекин ўзи келмади. Бошқалар биздан қачон бўлишини сўрамади ҳам”, – деди Олий суд расмийси.
Обидов бу каби судларда процесс узоқ давом этишини ҳисобга олиб, телевидениенинг имкониятларидан келиб чиқиб суднинг фақатгина ҳукм эълон қилинадиган кундаги мажлислари жонли эфирда узатилиши мумкинлигини ҳам истисно қилмади.
Kun.uz билан суҳбатлашган МТРК директори ўринбосари Мадаминбек Сафаров Жиззах вилояти ҳокимининг собиқ ўринбосарига доир суд иши бўлиб ўтганини бошқа ОАВлар қатори Олий суднинг хабаридан сўнг билганини таъкидлади.
“Биз ҳам суд бўлганини ҳукм эълон қилиниб, унинг хабари тарқалганидан кейин билдик. Бизга Олий суд камида бир кун олдин хабар бериши керак эди. Чунки биз техникалар билан бирга операторлар, мухбир, муҳаррир ажратишимиз, суд залига бориб ёруғликни ва овозни созлаб олишимиз керак. Буларга жамоани олиб борадиган ҳайдовчи билан қўшганда камида 10 кишини ажратишимиз керак. Бундай суд жараёнларини ёритиш ўзимиз учун ҳам яхши аслида”, – деди МТРК вакили.
Шунингдек, МТРК директори ўринбосари Мадаминбек Сафаров бу ҳолат ҳам Қонунчилик палатаси мажлисларининг ёритилишига доир масала каби ҳал қилиб олиниши билдирди.
Фармон ижросига масъул қилиб белгиланган яна бир ташкилот – Антикоррупция агентлиги матбуот хизматининг маълум қилишича, бу ҳолатда тарафларнинг розилиги билан, шунингдек, Жиноят процессуал кодексининг 19-моддаси асосида иш кўрилади.
“Бу ерда қонунни бузганликда ҳеч ким жавобгарликка тортиб бўлмайди. Чунки мажбур дейилмаган”, – дейилади агентлик жавобида.
Мавзуга оид

11:59 / 28.06.2025
Олий суд электр таъминотидаги муаммолар сабабли интерактив хизматларини вақтинча тўхтатди

14:09 / 20.05.2025
Дарахт кесиш учун ариза бераётганларни жамоатчилик кузатиб туради

16:52 / 07.05.2025
Ношаффоф хусусийлаштиришлар. Бу яна давом этадими?

23:37 / 01.05.2025