Солиқ, Фуқаролик ва Меҳнат кодексларига ўзгартиришлар киритилмоқда

Бугун, 11 январь куни бўлиб ўтган Олий Мажлис Қонунчилик палатасининг навбатдаги мажлисида Ўзбекистон республикасининг Солиқ, Фуқаролик ва Меҳнат кодексларига ҳамда бир қанча қонунларга ўзгартиришлар киритиш назарда тутилган лойиҳалар кўриб чиқилди.

Парламент қуйи палатаси мажлиси бу сафар спикер Нурдинжон Исмоилов томонидан эмас, балки унинг ўринбосари Акмал Саидов раислигида бўлиб ўтди.

Мажлисда дастлаб «Ўзбекистон Республикаси Фуқаролик кодексининг 565-моддасига ўзгартиш ва қўшимча киритиш тўғрисида»ги қонун лойиҳаси кўриб чиқилди.

Иккинчи ўқишда муҳокама қилиниб, қабул қилинган ушбу ҳужжат автомототранспорт воситаларини ижарага бериш билан боғлиқ муносабатларни енгиллаштириши ва ижара бозорини ривожлантириши кутилмоқда.

Депутатлар, шунингдек, «Фуқароларнинг давлат пенсия таъминоти тўғрисида»ги қонунга ҳамда Меҳнат кодексига ўзгартиш ва қўшимчалар киритиш ҳақида»ги қонун лойиҳасини кўриб чиқди.

Қонун лойиҳасида болаликдан ногиронлиги бўлган болаларга 18 ёшгача қараган даврини иш стажига қўшиб ҳисоблаш, болани парваришлаш вақтининг ҳаммасини жамланганда кўпи билан 6 йиллик даврни иш стажига қўшиб ҳисоблаш белгиланмоқда.

Шунингдек, лойиҳада республика ҳудудида карантинли ва инсон учун хавфли бўлган бошқа юқумли касалликлар тарқалиши таҳдиди мавжуд бўлган даврда амал қилиб турган пенсия олиш ҳуқуқи вужудга келган фуқаролар, ушбу тадбирлар (чекловлар) даврида ёки тугагандан сўнг бир ой ичида пенсия тайинлашни сўраб мурожаат этган тақдирда, уларга пенсия уни олиш ҳуқуқи пайдо бўлган санадан тайинлаш таклиф этилган. Мажлисда қонун лойиҳаси иккинчи ўқишда қабул қилинди.

Парламент қуйи палатаси биринчи ўқишда «Ўзбекистон Республикаси Савдо-саноат палатаси тўғрисида»ги қонунга қўшимча ва ўзгартиш киритиш ҳақида»ги қонун лойиҳасини ҳам кўриб чиқди ва қабул қилди.

Маълум қилинишича, хўжалик шартномалар доирасида юзага келадиган енгиб бўлмайдиган кучлар (форс-мажор) ҳолатларини тасдиқлаш амалдаги қонунчиликда белгиланмагани тадбиркорлик субъектлари учун амалиётда бир қатор муаммолар вужудга келишига сабаб бўлаётган эди.

«Хусусан, коронавирус пандемияси сабабли кўплаб тадбиркорлик субъектлари маҳаллий шартномалар доирасида юзага келадиган енгиб бўлмайдиган кучлар (форс-мажор) ҳолатларини тасдиқлашни сўраб Савдо-саноат палатасига мурожаат қилган. Лекин Палата бундай ваколатга эга бўлмагани сабабли, форс-мажор ҳолатларини тасдиқловчи сертификатлар берилмаган ва тегишли идоралар ёки хўжалик юритувчи субъектларга фақатгина хат чиқариш билан чекланилган.

Таклиф этилаётган қонун лойиҳаси билан маҳаллий шартномалар доирасида юзага келадиган енгиб бўлмайдиган кучлар (форс-мажор) ҳолатларини тасдиқлаш ваколатининг Савдо-саноат палатасига берилганлиги муносабати билан ушбу нормани қонунда белгилаб қўйиш таклиф этилмоқда”, - дейилади расмий релизда.

Шунингдек, мамлакатда озиқ-овқат нархлари барқарорлигини таъминлаш мақсадида Солиқ кодексининг 483-моддасига ўзгартиришлар киритиш назарда тутилган қонун лойиҳаси иккинчи ўқишда қабул қилинди. Қонун билан ўсимлик ёғи, кунгабоқар ва зиғир уруғи, соя данагини олиб кириш, ўсимлик ёғини (пахта ёғидан ташқари) ишлаб чиқариш ва реализация қилиш, гўшт (мол, қўй, товуқ), тирик ҳайвонлар (қорамол ва парранда) ва уларни сўйишдан олинган маҳсулотлар, картошка ҳамда музлатилган балиқни реализация қилиш бўйича айланма ҳамда уларни олиб кириш 2022 йил 30 апрелга қадар қўшилган қиймат солиғидан озод қилиниши назарда тутилмоқда.