Россия 1,8 млн тонна Украина донини ноқонуний равишда олиб чиқиб кетиши мумкин - ОАВ

Йил охиригача Россия Украинанинг эгаллаб олинган ҳудудларидан жами 1,8 миллион тонна дон олиб чиқиб кетиши мумкин. Бундай ҳисоб-китобларни 21 октябр, жума куни Германиянинг NDR радиоэшиттириш корпорациясининг суриштирув бўлими Россия ҳужжатлари, сунъий йўлдош тасвирлари ва кемалар ҳаракати ҳақидаги маълумотларга таянган ҳолда келтирмоқда. 

Украинадан Россия томонидан аннексия қилинган Қрим денгиз портларидан 1 миллион тоннага яқин юк аллақачон жўнатилган. 

Уруш бошланганидан бери буғдой ва бошқа донли 20 га яқин кема Севастополни тарк этди. Юкларнинг асосий қисми Сурия, Россия ёки Туркияга жўнатилган. 

Товарлар рўйхатидан кўриниб турибдики, йил охиригача Севастополдан яна 40 га яқин кемани жўнатиб юбориш режалаштирилган. Шу билан бирга, NDR маълумотларига кўра, россияликлар, эҳтимол, ушбу босқичда, келажакда Украина ҳудудларида тортиб олиниши кутилаётган донни ташиш учун логистикани ташкил қилишган. 

Агар режалар амалга оширилса, Россия жорий йилда ноқонуний ғалла экспортидан жаҳон бозори нархларида қарийб 600 миллион доллар (612 миллион евро) олиши мумкин.

Украина ҳукумати маълумотларига кўра, гап Россия томонидан эгаллаб олинган ҳудудлардаги умумий ғалла ҳосилининг чорак қисми ҳақида кетяпти. Украина иқтисодий ривожланиш, савдо ва қишлоқ хўжалиги вазирининг ўринбосари Тарас Висоцкий NDR билан суҳбатда украиналик фермерлар учун ижтимоий оқибатлар ҳақида огоҳлантирди: «Бу ақл бовар қилмайдиган ва жуда катта ижтимоий муаммо ҳисобланади. Минглаб фермерлар хавф остида».

Бир қатор ҳолларда, маҳсулотларни эгаллаб олинган ҳудудлардан қочиб кетган украиналик қишлоқ хўжалиги ишчилари ташлаб кетишган. Бундан ташқари, у экспроприация қилинган ёки демпинг нархларида сотиб олинган. Россия кемаларини кузатиш қийин, чунки улар Қримдаги транспондерларни ўчириб қўяди, бироқ NDR’нинг қайд этишича, сунъий йўлдош тасвирлари ва бошқа манбалар ёрдамида ҳаракатни кузатиш имкони бор.

Фрайбург университетининг халқаро ҳуқуқ бўйича эксперти Паулина Старски фикрича, ғалланинг катта миқёсда ўзлаштирилиши ҳарбий жиноят сифатида баҳоланиши мумкин. 

Вашингтондаги Америка университетидан бўлган Дэвид Крейн, ўз навбатида, тинч аҳолини тирикчилик манбаларидан маҳрум қилиш - ракета ҳужумлари каби шафқатсиз нарса, деб ҳисоблайди. 

NDR сўровига кўра, Россия элчихонаси: «Россия, албатта, нафақат донга бўлган эҳтиёжларини қондиряпти, балки бутун дунё бўйлаб экспорт сўровларига жавоб беряпти», дея маълум қилди. Шу билан бирга, дипломатик миссия Россияда Украина буғдойига талаб йўқлигини таъкидламоқда, чунки у «Россия маҳсулотидан сифат жиҳатидан паст». Сурия ва Туркия элчихоналари сўровларга жавоб бермади. 

Аввалроқ, 16 октябр куни Германия президенти Франк-Валтер Штайнмайер бутун дунё бўйлаб 830 миллион киши тўйиб овқатланмасликдан азият чекаётганини маълум қилганди – бу уч йил аввалгидан 150 миллион кишига кўп. Франк-Валтер Штайнмайер очарчиликнинг кучайиши нафақат бу ҳудудлардаги иқлим ўзгариши, балки ғалла, озиқ-овқат ва ўғит етказиб беришдаги узилишлар билан боғлиқ эканини таъкидлади. «Бунинг учун Россиянинг Украинага қарши шафқатсиз, тажовузкор уруши айбдор», деб тушунтирди у.