Шовот тумани ҳокими интизомий жазога тортилди

Хоразм вилояти, Шовот тумани ҳокими Артиқов Одилбек Саъдуллаевич интизомий жазога тортилди.

Фото: Шовот тумани ҳокимлиги матбуот хизмати

Вилоят ҳокими Фарҳод Эрманов фармойишига кўра, унга Меҳнат кодексининг 181-моддасига асосан ҳайфсан интизомий жазоси қўлланган.

Жазо сабаби сифатида «Иш фаолияти давомида ўзига юклатилган вазифаларни лозим даражада бажармасдан, хизмат интизомини бузгани» кўрсатилган.

Фармойишга Хоразм вилояти прокуратурасининг 2022 йил 16 ноябрдаги интизомий жавобгарлик тўғрисида иш қўзғатиш ҳақидаги қарори ва Одилбек Артиқовнинг тушунтириш хати асос қилиб олинган.

Артиқов Одилбек Саъдуллаевич 2022 йил март ойидан буён Шовот тумани ҳокими сифатида ишлаб келмоқда.