19-21 май кунлари Япониянинг Ҳирошима шаҳрида «Катта еттилик» саммити бўлиб ўтди. Унда Россиянинг кенг кўламли босқини бошидан буён илк бор Володимир Зеленский шахсан иштирок этди. Айнан Россия тажовузи (ва у билан курашиш усуллари) тадбирнинг асосий мавзуларидан бири бўлди. «Медуза» саммитнинг асосий якунларини келтирди.
Володимир Зеленский G7 саммитида шахсан иштирок этди. Японияга Зеленский Саудия Арабистонидан француз ҳукумати самолётида учиб келди, у олдинроқ Араб давлатлари лигаси йиғилишида чиқиш қилганди. У Россиянинг Украинага кенг кўламли босқини бошланганидан буён «Катта еттилик»нинг олти учрашувида, фақат онлайн режимда қатнашганди. Бу ташриф — Зеленскийнинг уруш бошидан буён Осиёга амалга оширган илк ташрифи бўлди.
Саммитдаги чиқишида Украина президенти мамлакатга замонавий қирувчи самолётлар етказиб беришга чақирди.
«Уруш даврида Украина «Катта еттилик» йиғилишларида олти бор иштирок этди, аммо фақат онлайн режимда. Ҳозир — шахсан миннатдорчилик билдириш учун қулай вақт. Биз демократия ва халқаро ҳуқуқ билан ҳисоблашишларига эришдик. Дунёда биз қадрлайдиган нарсаларни эътиборсиз қолдиришга уринишлар бўлди. Ҳозир эса бу имконсиз. Ҳозир бизнинг кучимиз ўсмоқда. Биз сиз билан қанча кўп ҳамкорлик қилсак, бошқа кимдир Россиянинг телбавор йўлидан бориши эҳтимоли шунчалик камаяди.
Кўп йиллар мобайнида биз Россия исталган мамлакатга гўёки қайтариб бўлмайдиган гипертовушли ракеталар билан, ҳеч қандай жазодан қўрқмаган ҳолда ҳужум қилиши мумкинлиги ҳақида эшитиб келдик. Энди бу гапларга якун ясалди. Буни украинлар қўлидаги Patriot тизимлари кўрсатиб берди. Биз сиз билан биргаликда исботладик: гап душманда қанча ракета борлигида эмас, балки бизда қанча ҳаво ҳужумидан мудофаа тизими мавжуд бўлишида экан. Аммо ердаги тизимларга ҳаводаги замонавий самолётларни қўшиш керак. Бизнинг учувчиларимиз F-16 билан танишганда ва бу машиналар осмонимизда пайдо бўлганида — бу Европа ва дунё хавфсизлиги учун тарихий лаҳза бўлади», — деди Зеленский.
Шунингдек, у «еттилик» етакчилари ва G7 таркибига кирмайдиган саккиз мамлакат раҳбарлари билан учрашди, улар орасида Ҳиндистон бош вазири Нарендра Моди ва Корея Республикаси президенти Юн Сок Ёл бор.
АҚШ президенти Жо Байден билан учрашувдан сўнг Украинага ҳарбий ёрдамнинг янги пакети эълон қилинди — жами 375 миллион долларлик. Бундан ташқари, CNN ва Associated Press (AP) агентликлари манбалари хабар беришича, саммитнинг биринчи кунида Байден G7 етакчиларига Вашингтон иттифоқчиларнинг украин учувчиларини Американинг F-16 самолётларида ўқитиш бўйича саъй-ҳаракатларини қўллаб-қувватлашини айтган. Украинага қачон ва қанча самолёт тақдим этилиши бўйича қарор яқин ойлар ичида эълон қилиниши кутилмоқда. АҚШ «қирувчилар коалицияси»ни қўллаши ҳақидаги маълумотни кейинроқ АҚШ президентининг миллий хавфсизлик бўйича маслаҳатчиси Жейк Салливан ҳам журналистларга тасдиқлади. «Зеленский мени қатъиян ишонтирдики, улар ундан [F-16 қирувчисидан] Россиянинг географик ҳудудларига кириш ва ичкарилаш учун фойдаланмайди, аммо, Россия қўшинлари Украина ҳудудида бўлганида улар бу ишни қилиши мумкин», — деган Байденнинг ўзи журналистларга.
