Азизбек Икрамов Фарғона вилояти ИИБ бошлиғи лавозимига тайинланди

Президент Шавкат Мирзиёев Фарғона вилоятига ташрифи давомида бир қатор ташкилий масалаларни кўриб чиқди.

Жумладан, Икрамов Азизбек Исроилович Фарғона вилояти ИИБ бошлиғи лавозимига тайинланди. У бунга қадар ички ишлар вазири ўринбосари лавозимида ишлаб келаётганди.

Азиз Икромов 1978 йилда Тошкент шаҳрида туғилган. 1996-2000 йилларда Ўзбекистон Республикаси Ички ишлар вазирлиги Ёнғин хавфсизлиги олий техника билим юртида таълим олган. 2000-2017 йилларда Ички ишлар вазирлигининг ёнғин хавфсизлиги бош бошқармасида турли лавозимларда – бош мутахассисдан бош бошқарма бошлиғи ўринбосаригача ишлаган.

Янги лавозимга тайинлангунга қадар, 2019 йилнинг ноябрь ойидан буён ички ишлар вазири ўринбосари – Маънавий-маърифий тарбия ва кадрлар билан таъминлаш бошқармаси бошлиғи лавозимида ишлаб келган. У бир муддат Маҳалла ва оилани қўллаб-қувватлаш вазирининг ўринбосари (2020-2021), шунингдек, ички ишлар вазирининг жамоат тартибини муҳофаза қилиш бўйича ўринбосари (2019-2021), Мудофаа вазирининг тарбиявий ва мафкуравий ишлар бўйича ўринбосари лавозимларида ишлаган (2017-2019).

Аввалроқ, Мирзиёев Фарғонада жиноятчилик ва ҳуқуқбузарликларга қарши курашиш масаласига алоҳида тўхталиб, бу борадаги ишлар аҳволи қониқарсизлигини танқид қилиб, вилоят ички ишлар бошқармаси бошлиғи Муҳиддин Жўраевни лавозимидан озод этган эди.