FT: Хитой Россия банкларига таъсирини кескин оширди

Хитой банклари Россиянинг Украинадаги ҳарбий ҳаракатларига жавобан ғарб санкциялари киритилгач, Россия банк тизимининг асосий кредиторларига айланди. Урушнинг бир ярим йили давомида Хитойнинг Россия банкларига таъсири тўрт баробарга ошди, деб ёзади Financial Times 4 сентябр, душанба куни Россия Банки маълумотларини таҳлил қилган Киев иқтисодиёт мактабига таяниб. 

Ушбу маълумотларга кўра, урушнинг дастлабки 14 ойи давомида Хитой саноат ва тижорат банки, Хитой банки, Хитой қурилиш банки ва Хитой қишлоқ хўжалиги банки Россияга юандаги сармояларни 2,1 миллиарддан 9,7 миллиард долларга оширган. 

Россия экспорт ҳисоб-китобларида юаннинг улуши 16 фоизгача ошди 

Худди шу даврда экспорт ҳисоб-китобларида «заҳарли валюталар» деб аталувчи улуш, биринчи навбатда, доллар ва евронинг улуши 50 фоиздан камроққа тушди, юаннинг улуши эса 16 фоизгача кўтарилди. Уруш бошланишидан олдин доллар ва евро экспорт тўловларининг 60 фоиздан ортиғини ташкил этган бўлса, юаннинг улуши бир фоиздан кам эди. 

«Хитой банкларининг доллар ва евро ўрнини юан билан тўлдираётган Россия молия-кредит муассасаларига бераётган кредитлари санкциялар ўз вазифасини бажараётганини кўрсатмоқда», — деди нашрга Киев иқтисодиёт мактабининг ривожланиш бўйича директор ўринбосари Андрей Оноприенко. 

Шу билан бирга, Россия Банкининг июл ойидаги ҳисоботида, шунингдек, молиянинг бошқа соҳаларида, хусусан, бир ярим йилдан кўпроқ вақт давомида Хитой валютасининг улуши деярли нолдан жорий йил июн ойида 44 фоизга етган валюта бозори биржа айланмасида долларнинг юанга алмаштирилиши ҳақида сўз боради. Ўз навбатида, The Moscow Times газетаси TrueEcon таҳлилчиларининг маълумотини келтирди. Унга кўра, Россия компанияларининг РФ банкларида юандаги депозитлари улуши 42,8 фоизгача, жисмоний шахслар бўйича эса - 14,4 фоизгача ошган.

Raiffeisen Bank’нинг Россиядаги активлари барча Хитой банклари инвестициясидан уч баравар кўп 

Шу билан бирга, Financial Times газетаси ёзишича, Хитой банклари ҳали ҳам Россияда фаолият юритаётган энг йирик ғарб банки - Австриянинг Raiffeisen Bank’дан орқада. Урушнинг бир ярим йил давомида ушбу банк Россиядаги активларини 40 фоиздан кўпроққа оширди - 20,5 миллиард доллардан 29,2 миллиард долларгача ва 2023 йил феврал ойи охирида, унинг юқори мартабали вакилларидан бири сўзларига кўра, Россия ва дунё ўртасидаги барча пул оқимларининг 40-50 фоизини ўтказди. Raiffeisen Bank Россия бизнесининг фойдаси жорий йил биринчи олти ойида 9,6 фоизга ошиб, 867 миллион еврога етди. 

Россия ҳукумати 2022 йилда хорижий банкларга мамлакатда шуъба корхоналарини сотишни анча қийинлаштирди. ЕМБ Европа банкларига Россияни тарк этишга мажбурлаш учун босимни кучайтирмоқда. Нашрнинг ёзишича, Raiffeisen Bank маҳаллий ва халқаро қонунларга риоя қилган ҳолда, Россиядаги бизнесини сотиш ёки тугатиш йўлларини топишга ҳаракат қилаётганини билдирган.