Хитой давлат кенгашининг собиқ бош вазири Ли Кэцян вафот этди

Хитой Халқ Республикаси давлат кенгашининг собиқ бош вазири Ли Кэцян тўсатдан юрак хуружига учради ва шифокорларнинг барча уринишларига қарамай, 27 октябр, жумага ўтар кечаси Шанҳайда вафот этди, деб хабар бермоқда CCTV Хитой давлат телеканали. Ўлимидан сўнгги бир неча кун олдин Ли Кэцян Шанҳайда даволанишда эди, дея таъкидлайди CCTV, тафсилотларни келтирмасдан. 

Ли Кэцян 2013 йилнинг мартидан 2023 йилнинг мартигача Хитой Халқ Республикаси давлат кенгаши – Хитойнинг олий давлат ижроия органи бош вазири лавозимида ишлаган. Dpa агентлиги бу лавозимни бошқа мамлакатлардаги бош вазир лавозими билан таққослайди. 

Сўнгги йилларда Ли ўз таъсирини йўқотди

Иқтисодчи сифатида таълим олган Ли бир вақтлар Хитой Коммунистик партияси (ХКП) раҳбарлигига етакчи номзод ҳисобланган, аммо сўнгги йилларда Хитой раҳбари Си Жинпинг томонидан «борган сари четга сурилган», дея таъкидлайди dpa. Шу тариқа, 2023 йилда Хитой Халқ Республикаси давлат кенгаши бош вазири лавозимини кўпинча Си Жинпингнинг ўнг қўли деб аталадиган Ли Цян эгаллади. 

Ли Кэцяннинг ўзи бу лавозимни тарк этди, чунки Хитой қонунчилиги уни учинчи муддатга қайта сайланишига имкон бермаган. Ва бундан олдин, Си Жинпинг чекловларга қарамай, яна бир бор Марказий қўмитанинг бош котиби этиб сайланган бўлса-да, у ХКП Марказий қўмитасининг ҳозирги таркибига қўшилмади. 

Ли Кэцян Хитойнинг юзи сифатида 

Хитой Халқ Республикаси давлат кенгаши раҳбари сифатида Ли Кэцян Европа Иттифоқи билан музокараларда бир неча бор Хитой Халқ Республикаси вакили бўлган, шунингдек, 2019 йилда Хитойга ташрифи чоғида Германиянинг собиқ канцлери Ангела Меркел билан учрашган. 

Ли ўз интервюларида «Европа фаровонлиги» тарафдори бўлган бўлса-да, бу Брюсселни Хитой ҳукмрон партиясининг самимийлигига ишонтирмади, дея таъкидлайди dpa. Масалан, Ли Кэцян анъанавий тарзда «16+1» форматидаги учрашувларда Хитой вакили бўлди, унда Пекин ҳамда Марказий ва Шарқий Европанинг 16 давлати ўртасидаги ҳамкорлик муҳокама қилинади. Ушбу учрашувлар формати Брюсселда бир неча бор хавотир уйғотган – танқидчилар Хитой ташқи сиёсатида кўпинча «бўл ва ҳукмронлик қил» тамойилига амал қилишини, бу эса Европа Иттифоқи бирлигига зарар етказиши мумкинлигини таъкидлаган.