Вояга етмаганлар бўйича инспектор-психологларга ота-оналарга нисбатан маъмурий жазо қўллаш ҳуқуқи берилади

Сенат ялпи мажлисида “Ўзбекистон Республикаси Маъмурий жавобгарлик тўғрисидаги кодексининг 248-моддасига қўшимчалар киритиш ҳақида”ги қонун муҳокама қилинди.

Қонун билан вояга етмаганлар масалалари бўйича инспектор-психологлар ҳамда хотин-қизлар масалалари бўйича инспекторларнинг ваколатлари кенгайтирилмоқда.

Жумладан, вояга етмаганлар масалалари бўйича инспектор-психологларга:

– вояга етмаганларни тарбиялаш ва уларга таълим бериш борасидаги мажбуриятларини бажармагани учун ота-оналар ёки уларнинг ўрнини босувчи шахсларга нисбатан маъмурий жазо қўллаш;

– таълим муассасалари ҳудуди ва унинг атрофида ўқувчилар тарбиясига салбий таъсир кўрсатиши мумкин бўлган ҳуқуқбузарликларнинг олдини олиш ва мактабларда жамоат хавфсизлигини таъминлаш мақсадида ҳуқуқбузарлик содир этган шахсларга нисбатан маъмурий баённома тузиш ҳамда белгиланган тартибда жазо чорасини қўллаш;

– вояга етмаганларни ғайриижтимоий хатти-ҳаракатларга (спиртли ичимликларни, гиёҳвандлик воситалари ёки одамнинг ақл-идрокига, иродасига таъсир қиладиган моддаларни истеъмол қилишга) жалб қилган шахсларга нисбатан маъмурий жазо қўллаш ваколати бериляпти.

Хотин-қизлар масалалари бўйича инспекторлар эса ҳимоя ордери талабларини бажармаслик учун назарда тутилган маъмурий ҳуқуқбузарликлар тўғрисида баённома тузиш ҳуқуқига эга бўлади.

Таъкидланишича, бугунги кунда туман-шаҳар ички ишлар органлари таркибида 2 мингта штат бирлиги асосида бевосита ўрта мактабларда хизмат ўтовчи вояга етмаганлар масалалари бўйича инспектор-психологлар фаолияти йўлга қўйилган. Уларга мактабларда психологик муҳитни яхшилаш, вояга етмаганлар орасида қонунбузилишларга нисбатан муросасиз муносабатда бўлиш ҳиссини шакллантириш, муаммоли ўқувчилар билан уларнинг яшаш жойларида ота-оналари иштирокида манзилли ишлаш вазифалари юкланган.

Бироқ уларга ўз вақтида ва жойида маъмурий ишларни кўриб чиқиш ваколати берилмагани вояга етмаганлар ҳамда уларнинг ота-оналарининг инспектор-психологлар талабларига бўйсунмаслигига ва амалга оширилаётган профилактик тадбирларга беписандлик билан қарашига олиб келмоқда.

Бундан ташқари, ички ишлар органлари тизимида 337 та штат бирлигидан иборат хотин-қизлар билан ишлаш масалалари бўйича инспектор лавозимлари жорий этилган. Тазйиқ ўтказган ёки зўравонлик содир этган шахс ҳимоя ордери талабларини бажармагани учун 2022 йилда Маъмурий жавобгарлик тўғрисидаги кодекснинг 2061-моддаси билан 2 833 та, 2023 йилда эса 1 945 та ҳуқуқбузарлик аниқланган. Аммо уларда маъмурий баённома расмийлаштириш ваколати мавжуд эмас.

Қонун сенаторлар томонидан маъқулланди.