Қўшимча функционаллар
-
Тунги кўриниш
Қашқадарёда кўприк қулаб тушди
Бунга айланма йўлдан ҳаракатланиш ўрнига носоз кўприкдан ўтмоқчи бўлган юк машинаси ҳайдовчиси сабаб бўлган
Фото: Муборак тумани ҳокимлиги ахборот хизмати
Қашқадарё вилояти Муборак туманида тепасига оғир автотранспорт чиққан кўприк қулаб тушган. Туман ҳокимлиги ахборот хизматининг хабар беришича, ҳодиса бугун, 16 феврал куни содир бўлган.
Маълум қилинишича, Муборак тумани ҳудудидан ўтувчи “Муборак – Помуқ – Аланг – Нишон” автомобил йўлининг 17-километрида, 1982 йилда (зовур устида) қурилган кўприк оғир юк мунтазам ҳаракатланиши натижасида носоз ҳолатга келиб қолган.
Ҳозирда кўприкдан ҳаракатланиш тўлиқ чекланган, ахборот берувчи йўл белгилари ўрнатилган ва автотранспорт ҳаракати учун вақтинчалик айланма йўл ташкил қилинган.
Бироқ 2024 йил 16 феврал куни оғир автотранспорт воситаси айланма йўлдан эмас, носоз кўприкдан ҳаракатланиши оқибатида унинг темир-бетон плиталари синган ва қулаб тушган. Содир бўлган ҳодисада салбий ҳолат кузатилмаган.
Қайд этилишича, 2024 йилда мазкур кўприкни қайта қуриш белгиланган бўлиб, йилнинг 2-чорагида тўлиқ қайта қурилиб фойдаланишга топширилиши режалаштирилмоқда.
