Фарғонада мактаб директори ўқувчи қизни калтаклаганида жароҳат етказгани маълум бўлди

Kun.uzʼнинг 7-синф ўқувчиси директор томонидан калтакланганига оид хабаридан сўнг Болалар омбудсмани ҳолатни назоратга олди. Дастлабки ўрганишларга кўра, муассаса раҳбари қизни урган вақтида тан жароҳати етказган. Ҳозирда ҳолат бўйича терговга қадар текширув олиб борилмоқда.

Фото: Видеодан кадр

20 май куни Kun.uzʼда Фарғона вилояти Бувайда туманидаги Хорижий тилларга ихтисослашган мактабнинг 7-синф ўқувчиси рўмоли (вандамка)ни ечмагани сабаб мактаб директори томонидан калтакланганига оид хабар эълон қилинганди.

Воқеа юзасидан Болалар омбудсмани расмий муносабат билдирди. Қайд этилишича, 17 май куни алгебра дарсида 2010 йилда туғилган 7-синф ўқувчиси ўғил бола синфдош ўртоғи билан оғзаки тортишиб қолган. Бироз вақт ўтганидан сўнг синфхонасига мактаб директори кириб келган, алгебра ўқитувчиси унга ўқувчилар тортишганини айтган.

“Мактаб директори қиздан синфдоши билан нима учун жанжаллашганини, мактабга нега диний либосда рўмол ўраб келганини сўраб, рўмолни ечишни айтган. Қиз мактаб директорига гўёки гап қайтариб, рўмолини ечмаслигини айтгани учун директор қизни уриб, жароҳат етказган”, – дейилади изоҳда.

Ҳозирда ҳолат юзасидан Бувайда тумани ИИБ томонидан терговга қадар текширув ҳаракатлари олиб борилмоқда. Вазият Болалар омбудсмани томонидан назоратга олингани, бу бўйича қўшимча маълумот берилиши айтилди.