Шавкат Мирзиёев ва Ражаб Тоййиб Эрдўған Анқарада Ўзбекистон ва Туркиянинг етакчи компаниялари раҳбарлари билан учрашди. Йиғилишда ҳар икки мамлакат ўртасидаги иқтисодий ҳамкорликни кенгайтириш таъкидланган.
Ўзбекистон томонидан тадбирда Global Textile, ProCab, Agromir Group, ERIELL Group, Akfa Holding, Murad Buildings, SAG, BMB Holding, Uzbekistan Hydrogen компаниялари иштирок этган.
Туркия томонидан Çalık, Cengiz, Acibadem, Eczacıbaşı, Anadolu Group, Aksa Energy, Zorlu, Kalyon, Onur Group каби ҳолдинг компаниялари қатнашган.
Тадбиркорлар билан бундай форматдаги мулоқот илк бор ўтказилмоқда. Йиғилишда Ўзбекистон ва Туркия президентлари Ишбилармонлар кенгашининг тузилиши икки томонлама муносабатлар ривожи янги босқичга кўтарилганининг рамзи эканини таъкидлаган.
Ўзбекистон раҳбари икки томонлама савдо-иқтисодий ва инвестициявий шериклик изчил суръатда ривожланиб бораётганидан мамнунлигини билдирган.
Маълум бўлишича, сўнгги беш йилда Ўзбекистонда турк сармояси иштирокидаги корхоналар сони уч баробарга ошган ва 2 мингтага етган. Инвестициялар ҳажми икки баробарга ортган.
Президентимиз энергетика, қурилиш, кончилик ва озиқ-овқат саноати соҳаларида Cengiz Energy, Aksa Energy, Çalık Holding, Eczacıbaşı ва Anadolu каби турк компанияларининг муваффақиятли фаолиятини кўрсатиб ўтган.
Давлатимиз раҳбари ҳамкорликнинг истиқболли йўналишларини белгилаб, энг аввало, инвестициявий шериклик ва саноат кооперациясини кенгайтиришни таклиф этган.
Ўзбекистон-Туркия саноат кластерини ташкил этиш юзасидан келишувга эришилган.
Ўзбекистон президенти давлат-хусусий шериклик механизмларини ривожлантиришга алоҳида эътибор қаратган. Шу асосда 3 миллиард долларлик қўшма лойиҳаларни амалга ошириш режалаштирилган.
Кенгаш учрашувида кончилик саноатида ҳамкорлик қилиш устувор йўналишлардан бири сифатида қайд этилди. Туркиянинг йирик кон-геология компаниялари билан фойдали қазилмаларни ўрганиш ва қазиб олиш бўйича амалий ишлар бошланган.
Ўз навбатида, Эрдўған Туркия Ўзбекистон билан барча соҳаларда ўзаро манфаатли алоқаларни янада мустаҳкамлашга интилишини билдирган.
У икки мамлакат ишбилармонлари ўртасида тўғридан-тўғри ҳамкорликни ривожлантириш учун катта салоҳият мавжудлигини таъкидлаган. Туркия етакчиси кенгаш иштирокчиларини савдо-иқтисодий ва инвестициявий алоқаларни мустаҳкамлаш мақсадида конструктив мулоқотга чақирган.
Учрашувда Ўзбекистон ва Туркиянинг етакчи компаниялари раҳбарлари томонидан устувор соҳаларда ҳамкорликни янада чуқурлаштиришга қаратилган аниқ таклифлар билдирилган.
Давлат раҳбарлари тадбиркорлар биргаликда ишлашга тайёрлиги учун самимий миннатдорлик билдириб, масъул раҳбарларга ишбилармонларни ҳар томонлама қўллаб-қувватлаш бўйича кўрсатмалар берган.
