Зеленский Путиннинг урушни тугатиш шартларини «ултиматум» деб атади

Украина президенти Володимир Зеленский Россия президенти Владимир Путиннинг ҳарбий ҳаракатларни тўхтатиш ва тинчлик музокараларини бошлаш шартларини «ишониб бўлмайдиган ултиматум» деб атади. Бу ҳақда у G7 саммити чоғида маълум қилди, деб хабар берди Reuters. 

«Бу ултиматум шартлар, аввалгиларидан фарқ қилмайди», деди Зеленский. Унинг фикрича, Путин «тўхтамайди». 

«Бу Ҳитлернинг: «Менга Чехословакиянинг бир қисмини беринг ва шу билан ҳаммаси тамом бўлади», деганига ўхшаш. Лекин бу ёлғон. Кейинчалик у Полшани, сўнгра бутун Европани босиб олди. <…> Биз бу хабарларга ишонмаслигимиз керак, чунки Путин ҳам худди шу йўлдан кетмоқда. Бугун у тўртта ҳудуд ҳақида гапиряпти, лекин аввалроқ Қрим ва Донбасс ҳақида гапирган эди», деди Зеленский. 

Россия президенти Владимир Путин 14 июн куни Украинада ҳарбий ҳаракатларни тўхтатиш ва тинчлик музокараларини бошлаш шартларини айтиб ўтди. Бу талабларга кўра, Украина Донецк, Луганск, Херсон ва Запорожие вилоятлари ҳудудидан қўшинларини тўлиқ олиб чиқиб кетишини, шунингдек, НАТОга қўшилиш режаларидан воз кечишини расман эълон қилиши керак. Қолаверса, Ғарбнинг Россияга қўйган санкциялари ҳам бекор қилиниши керак.