Қашқадарёда 8 кунлик чақалоғини сотмоқчи бўлган эр-хотинга ҳукм ўқилди

Шаърий никоҳ асосида яшаб келган 53 ёшли эркак ҳамда 35 ёшли аёл чақалоғини 190 млн сўмга сотмоқчи бўлганида тезкор тадбирда қўлга олинган. Улар суддаги кўрсатмасида ушбу пулга уй сотиб олмоқчи бўлишганини айтган.

Қашқадарё вилоятининг Қарши туманида ўзларининг 8 кунлик қизини сотмоқчи бўлган эр-хотинга ҳукм ўқилди.

Kun.uz танишган суд ҳукмида келтирилишича, 1971 йилда туғилган, 7 фарзанднинг отаси бўлган Б.Қ. 35 ёшли М.А. билан ўзи қоровул бўлиб ишловчи корхонада шаърий никоҳ асосида бирга яшаб келган. Улар 2024 йилнинг 25 феврал куни қиз фарзандли бўлишган.

Аёл чақалоғини сотиб, уй олиш ҳақида ўйлаган ва буни Б.Қ.га айтган. Шу тариқа улар қизига харидор излаган. 2024 йилнинг 5 март куни чақалоқни олмоқчи бўлган фуқаро Б.Қ.нинг уйига келган ва улар “савдолашган”. Аввалига “харидор” 150 млн сўм олиб келганини айтган. Б.Қ. эса бу кам эканини, қизини 200 млн сўмга сотишини билдирган. Улар 190 млн сўмга келишган.

Б.Қ. келишилган пулдан 45 млн сўмини олган вақтида ҳуқуқни муҳофаза қилувчи органлар ходимлари томонидан ўтказилган тезкор тадбирда ушланган.

Жиноят ишлари бўйича Қарши туман судининг 2024 йил 28 июндаги ҳукми билан Б.Қ. ҳамда М.А. Жиноят кодексининг 135-моддаси (одам савдоси) 3-қисми “а” бандида назарда тутилган жиноятни содир қилганликда айбли деб топилган. М.Қ.га 5 йил 1 ой муддатга озодликдан маҳрум қилиш, М.А.га эса 4 йил муддатга озодликни чеклаш жазоси тайинланган.

#Қашқадарё