«Биргина телефон қўнғироғи билан урушларни тўхтата оламан» — Трамп

Доналд Трамп Республикачилар партиясининг Милуокидаги қурултойида катта нутқ сўзлади. У президентликка номзод бўлишга расман розилигини билдирди, 13 июл куни Пенсилванияда бўлиб ўтган митингда ўзига нисбатан уюштирилган суиқасд ҳақида гапирди ва ҳозирги Америка маъмуриятини ички ва ташқи сиёсатдаги муваффақиятсизликлар учун танқид қилди. Баъзи тарафдорлар қулоғидан жароҳат олган Трампни қўллаб-қувватлаш учун Америка байроғини қулоқларига тақиб олишди. Трампнинг нутқи тахминан бир ярим соат давом этди ва CNN телеканали таъкидлаганидек, президентликка номзоднинг АҚШ яқин тарихидаги энг узун нутқи бўлди. «Медуза» Трамп нутқидан иқтибослар келтирди.

Трамп қурултойдаги нутқини АҚШ президентлигига номзодини қўйишга расман розилик беришдан бошлади (Республикачилар партияси уни 15 июлда расман номзод сифатида кўрсатган эди), сўнг дарҳол ўзига суиқасд қилинган кун ҳақида гапиришга ўтди.

У воқеани фақат бир марта тилга олишини айтди, чунки буни «гапириш ҳақиқатдан ҳам жуда оғриқли». Трамп сўзларига кўра, Пенсилваниядаги митингда у чийиллаган товушни эшитган ва қулоғини чангаллаб, қўли қонга беланганини кўрган. «Мен ўзимга: «Вой, бу нима эди? Бу фақат ўқ бўлиши мумкин», дедим, деб эслайди Трамп. Унинг сўзларига кўра, буни ҳужум эканлигини дарҳол англаган. «Ҳамма жойда қон оқарди, лекин маълум маънода ўзимни бутунлай хавфсиз ҳис қилдим, чунки Худо мен томонда эди», деди Трамп.

Унинг таъкидлашича, митингдаги оломон ўқ узилганидан кейин қочиб кетмаган, чунки «одамлар унинг жуда жиддий хавф остида эканини билган» ва уни тарк этишни истамаган.

«Мен бу кечада бу ерда бўлмаслигим керак эди», деди Трамп. «Йўқ, керак эди», деб жавоб берди оломон унга. «Фақат Қудратли Худонинг инояти билан мен бу саҳнада сизнинг олдингизда турибман», деб қўшимча қилди Трамп.

Шундан сўнг республикачи номзод демократларни танқид қилишда давом этди ва унинг судларда таъқиб қилинишига ишора этиб, «жодугар ови»ни тўхтатишга чақирди. Унинг сўзларига кўра, Демократик партия «адолат тизимидан қурол сифатида фойдаланишни ва ўзининг сиёсий рақибини демократия душмани деб аташни зудлик билан бас қилиши керак». Трамп Жо Байден ҳақида гапириб, уни мамлакатга «АҚШ тарихидаги энг ёмон ўнта президент» биргаликда олиб келмаган зарар етказганликда айблади. Кейин у Байденнинг номи нутқда бошқа тилга олинмаслигига ваъда берди.

Трамп бўлажак сайловларни «мамлакат тарихидаги энг муҳими» деб атади, у мамлакатни «қобилиятсиз раҳбардан халос қилиши керак», деди. Шундан сўнг президентликка номзод ўз дастурининг асосий бандларига ўтди.

Солиқлар ва инфляция

Трамп 2016-2020 йиллардаги президентлик даврида тарихдаги энг кенг қамровли солиқ имтиёзларини маъқуллаганини ва энди бундан ҳам кўпроқ нарсани қилишини айтди. У инфляция инқирозини фоиз ставкалари ва энергия харажатларини пасайтириш орқали ҳал қилишга ваъда берди.

Бироқ, CNN телеканалининг таъкидлашича, Трамп 2017 йилда имзолаган солиқ имтиёзлари ялпи ички маҳсулот улуши бўйича ҳам, инфляцияга мослаштирилган долларларда ҳам тарихдаги энг катта чегирма бўлмаган.

Миграция инқирози

«Мен чегарамизни ёпиб, кўп қисми барпо қилинган деворни якунлаш орқали ноқонуний иммиграция инқирозига барҳам бераман», деди Трамп. Унинг сўзларига кўра, Қўшма Штатларнинг жанубий чегарасида мигрантларнинг «оммавий бостириб кириши» бутун мамлакат бўйлаб жиноятчилик, қашшоқлик, касаллик ва вайронагарчиликка олиб келди. Пенсилванияда бўлиб ўтган митингда Трамп мигрантлар инқирози ва ўзининг президентлиги даврида жамоаси бу соҳада амалга оширган «улкан иш» ҳақида гапираётганида ўққа тутилган эди.

Урушлар ва можаролар

Трамп Американинг амалдаги маъмурияти яратган «ҳар қандай халқаро инқирозга», жумладан, Россиянинг «Украина билан даҳшатли урушига» барҳам беришини айтди. Унинг қўшимча қилишича, агар у президент бўлганида ҳеч қачон бунга йўл қўймасди. Шунингдек, Трамп сўзларига кўра, Исроилга доимий ҳужумлар оқибатида Яқин Шарқда бошланган уруш ҳам бўлмасди. «Эрон хонавайрон эди. Эронда пул йўқ эди. Ҳозир Эронда 250 миллиард доллар бор. Улар буларнинг барчасига сўнгги икки ярим йил ичида эришдилар», деб қўшимча қилди у.

«Мен янги урушларни бошламаган биринчи президент эдим. Биз энг ҳурматли эдик. Ва сиз буни кўрдингиз. <…> Президент Буш даврида Россия Грузияга бостириб кирди. Президент Обама даврида Россия Қримни эгаллаб олди. Ҳозирги маъмурият даврида Россия бутун Украинада [ҳукмронлик қилмоқда]. Президент Трамп даврида Россия ҳеч нарсани қўлга киритмади», деди у.

Трампнинг таъкидлашича, Россия АҚШ қўшинлари Афғонистондан олиб чиқиб кетилганини кўргач, Жо Байден маъмуриятининг ноқобиллигидан «илоҳомланди» ва Украинадаги урушни бошлади. Трамп сўзларига кўра, у «биргина телефон қўнғироғи билан урушларни тўхтата олади».

«Пенсилваниядаги ҳужумчи бизнинг ҳаракатимизни тўхтатмоқчи эди, лекин ҳақиқат шундаки, бу ҳаракат ҳеч қачон менга тегишли эмас эди. Бу ҳар доим сиз ҳақингизда бўлган. Бу сизнинг ҳаракатингиз. Бу мамлакатимиз тарихидаги энг йирик ҳаракатдир. Буни тўхтатиб бўлмайди», деб қўшимча қилди Трамп нутқининг охирида.