Россияликлар Uzbekistan Airways рейсларида ўғрилар пайдо бўлгани ҳақида шикоят қилди

Uzbekistan Airways авиакомпанияси рейслари орқали Осиёга парвоз қилган ўнлаб россияликлар пул ўғрилари қурбони бўлганидан шикоят қилишди. Бу ҳақда «Авиаторщина» хабар берди.

Қайд қилинишича, Бали оролига учган самолётнинг камида 5 нафар йўловчиси 2 мингдан 5 минггача АҚШ долларини ўғирлатганини айтган. Жабрланувчиларнинг тахмин қилишича, жиноятчилар назорат ходимлари билан тил бириктирмоқда: гўё улар аввал эҳтимолий жабрланувчини ва пулларнинг қаерда турганини аниқлайди. Сўнгра катта миқдорда пул бўлган сумкаларни атайлаб очади. Тошкент орқали Куала-Лумпурга йўл олган россияликларда ҳам шунга ўхшаш ҳолатлар кузатилган.

Ушбу рейсда жабрланганлардан бирининг айтишича, самолётда пулларнинг қаерда турганини олдиндан аниқ билган бир нечта «ўғрилар» бўлган. Улар узоқ парвоз пайтида «қурбонлар» ухлаб қолишини кутади, сўнгра эҳтиёткорлик билан керакли жавон олдига бориб, рюкзаклар ва сумкаларни очиб, пулларни олишади ва ўрнига бирор нарса қўйиб қўйишади, шунда жабрланувчи пули йўқолганини дарҳол англамайди. Жабрланувчи эркак билан боғлиқ ҳолатда ўғрилар доллар ўрнига ўзбек сўмини қўйишган.

Uzbekistan Airways вакилининг «Авиаторщина»га маълум қилишича, 20 июл куни авиакомпанияга бу ҳақда биринчи ариза келиб тушган. Орадан бир ҳафта ўтиб, ўғрилардан бири ушланган. Тошкент — Бали рейсида учаётган россиялик ўзининг сумкасига кимдир қўл узатаётганини кўриб қолган. Шунда ўғри ҳам чўчиб, пулни жавонга отиб юборган. Россиялик сайёҳ шошаётгани ва пулини йўқотмагани боис ариза ёзмагани айтилмоқда.

Uzbekistan Airways вакилининг аниқлик киритишича, шунга ўхшаш ишларни Хитойнинг Ҳэнан провинциясида яшовчилар содир этмоқда. Улар кўпинча шундай йўллар билан «бойлик орттириш» мақсадида халқаро рейсларда багажсиз учади. Таъкидланишича, уларнинг ўғирликларга алоқадорлигини ҳали исботлашнинг имкони бўлмаган - буни амалга ошириш жуда қийин (фақат жиноят устида қўлга олинсагина мумкин).

Авиакомпания аллақачон бунга қарши чоралар кўрганини маълум қилган.

«Бу воқеалардан кейин биз стюардессаларимизни огоҳлантирдик. Биз аллақачон ҳушёрлик билан кузатиб боряпмиз ва рейсларимизда багажсиз учаётган хитойликларни аниқлаяпмиз. Улар гуруҳ бўлиб учганида, салон бўйлаб турли жойларда ўтиришади, биз уларнинг қандай «ишлашини» тахминан тушунамиз», деб тушунтириш берган авиакомпания вакили.

Унинг сўзларига кўра, аслида бу халқаро муаммо бўлиб, ҳодисалар фақат битта авиакомпанияда юз бермаяпти.

«Улар оммавий тарзда Истанбул, Ҳонконг ва бошқа шаҳарларга саёҳат қилишади. Бу нафақат бизда, балки, масалан, Turkish Airlines рейсларида ҳам содир бўлади. Афтидан, навбат бизга етиб, тунги рейсларимизда «тирикчилик қила бошлашди», деб авиакомпания вакили сўзларини келтирмоқда манба.