Азиз Воитов устидан суд жараёни 15 августда бошланади

Собиқ қишлоқ хўжалиги вазири ўзлаштириш ёки растрата йўли билан талон-торож қилиш ва бошқа моддалар билан айбланмоқда. Иш доирасида икки нафар тадбиркорга нисбатан ҳам айбловлар эълон қилинган.

Фото: Kun.uz

15 август, пайшанба куни жиноят ишлари бўйича Миробод туман судида собиқ қишлоқ хўжалиги вазири Азиз Воитовга нисбатан жиноят ишини кўриб чиқиш бошланади. Бу ҳақдаги маълумот Олий суд сайтида келтириб ўтилди.

Тергов органи Азиз Воитовга Жиноят кодексининг 4 та моддаси бўйича айблов қўйган:

167-модда 3-қисми “а” ва “в” бандлари — бир гуруҳ шахслар томонидан олдиндан тил бириктирган ҳолда, кўп миқдорда ўзлаштириш ёки растрата йўли билан талон-торож қилиш;
205-модда 2-қисми “а” банди — жуда кўп миқдорда зарар етказган ҳолда, ҳокимият ёки мансаб ваколатини суиистеъмол қилиш;
206-модда 2-қисми “а” банди — жуда кўп миқдорда зарар етказган ҳолда, ҳокимият ёки мансаб ваколати доирасидан четга чиқиш;
209-модда 2-қисми “а” банди — такроран содир этилган мансаб сохтакорлиги.

Бу иш доирасида тадбиркорлар Орзубек Отабоевич Ражабов ва Алишер Фазлиддинович Ўрунбоев ҳам судланувчи ҳисобланади.

Орзубек Ражабов ўзлаштириш ёки растрата йўли билан талон-торож қилиш, савдо ёки хизмат кўрсатиш қоидаларини бузиш, мансаб сохтакорлиги, пора бериш ва ҳужжатларни сохталаштириш жиноятларида айбланмоқда.

Алишер Ўрунбоевга эса ўзлаштириш ёки растрата йўли билан талон-торож қилиш айблови қўйилган.

Эслатиб ўтамиз, Қишлоқ хўжалиги вазирлигининг собиқ раҳбари Азиз Воитов 2023 йил декабр ойида қамоққа олинган эди.

44 ёшли Воитов 2022 йил августидан 2023 йил октябригача ҚХВни бошқарган, унгача инвестициялар ва ташқи савдо вазирининг биринчи ўринбосари лавозимида ишлаган.

#коррупция #суд #қишлоқ хўжалиги #Азиз Воитов