Миясига чип ўрнатилган фалаж бемор фикр кучи билан CS-2 ўйнади

Август ойи бошида Илон Маск компанияси томонидан ишлаб чиқилган Neuralink чипи иккинчи бемор миясига муваффақиятли имплантация қилинган эди. Бир неча ҳафта ўтгач, у фикр кучи билан Counter-Strike 2 онлайн отишмасини ўйнашни ўрганди.

Беморнинг исми Алекс ва у америкалик. Эркакнинг умуртқа поғонаси шикастланган ва оёқ-қўллари фалаж бўлиб қолган. Унга Барроу Неврологик институтида чип имплантация қилинди. Операциядан бир кун ўтиб, унга шифохонадан жавоб берилди. Компанияга кўра, тикланиш жараёни «силлиқ кечди».

Алекс компютер курсорини бошқаришдан бошлади: бу вазифани ўзлаштириш учун унга беш дақиқа вақт керак бўлди. Тез орада у шахсий компютер интерфейсини эркин бошқариши мумкин эди. Кейин у янги босқичга чиқди ва Counter-Strike 2 ўйнашни ўрганди.

Беморнинг айтишича, ўйинда шунчаки югуриш ҳам жуда ёқимли бўлди. Кўз қаерга қараса, камера шу жойга йўналтирилди. Алекс отишни ҳам ўрганди: ҳозирча мукаммал эмас, лекин жуда самарали.

Neuralink ҳозир у билан компютерни бошқариш қобилиятини яхшилаш устида ишламоқда. У бажариши мумкин бўлган буйруқлар рўйхатини кенгайтириш, айлантириш, катталаштириш ва тортиш каби мураккаброқ нарсаларни қўшиш режалари мавжуд. Алекс 3D-моделлаштиришни ўрганмоқчи: у аввал автомеханик бўлиб ишлаган.

Neuralink беморлар учун бошқариш имкониятларини кенгайтиришда давом этмоқда. Компания чипли одамларга видео ўйинларда сичқонча ва контроллер функцияларини тўлиқ таъминлаш учун бир вақтнинг ўзида бир нечта ҳаракатларни амалга ошириш имкониятини бермоқчи. Шунингдек, у матн киритишни тезлаштириш учун қўл ёзувини аниқлаш алгоритмларини ишлаб чиқади. Йил охиригача чипни яна саккиз кишига ўрнатиш режалаштирилган.

Илон Маскнинг таъкидлашича, 10 йилдан кейин миллионлаб фалаж беморлар имплантлардан фойдаланиши мумкин.