«Толибон» аёлларнинг бегона эркакларга қараши ва ўз уйида баланд овозда гаплашишини тақиқлади

«Толибон» Афғонистондаги аёлларга эркакларга қараш ва жамоат жойларида баланд овозда гаплашишни тақиқламоқда. Янги тартиб-қоидалар қайд этилган 114 варақли ҳужжат билан танишиб чиққан The Telegraph’нинг ёзишича, афғон фуқароларининг кундалик ҳаётини тартибга солиш бўйича қатъий чоралар белгиланган.

«Балоғат ёшидаги аёлларнинг бегона эркакларга қараши тақиқланади», — дейилади қоидаларнинг бирида. Шунингдек, аёлларга «ўзгалар нафсини қўзғатмаслик ва уларни ўзига жалб этмаслик» учун юзларини ёпиб юриш ва бегона эркаклар бор жойда суҳбатдан тийилиш буюрилган.

Бундан ташқари, афғон аёлларига овозлари кўчага эшитилмаслиги учун ўз уйларида ҳам баланд овозда гаплашиш тақиқланган.

«Халқаро ҳамжамиятнинг «Толибон» билан ўзаро муносабатлари уларни аёлларга босимни давом эттиришга ундади. Ҳокимият тепасидагилар бизнинг мавжудлигимизни тан олишдан бош тортаётган радикал шахслардир», — дейди Кобулда давлат идорасида ишлаган Зайнаб исмли собиқ ходим.

Асосан аёллар юриш-туришига тааллуқли бўлган янги қоидалар уларга жамоат жойларида доимо таналарини ёпган ҳолда юриш мажбуриятини юкламоқда.

Бундан ташқари, аёлларга жамоат жойида қўшиқ айтиши ёки Қуръон ўқиши ҳам тақиқланган, уларнинг уст-боши эса юпқа, тор ёки калта бўлмаслиги керак.

Такси ҳайдовчиларига «ҳижобсиз ёки эркак маҳрами бўлмаган аёлларни» олиб юриш, транспорт воситасида мусиқа тинглаш ҳам тақиқланди. «Толибон»га кўра, янги қоидаларга бўйсунмаганлар ҳибсга олиниб, қамоққа юборилади.

Шунингдек, эркакларнинг ҳам жамоат жойларидаги аёллар юзига қараш, тор кийим кийиши ҳам тақиқланди. Шу билан бирга, энди улар соқолини калталатиши ҳам мумкин эмас.

Нашрнинг ёзишича, янги қоидалар шундоқ ҳам гуманитар ташкилотларда ишлаш, боғларга бориш, эркак ҳамроҳсиз ҳаракатланиш тақиқланган афғон аёлларининг ғазаби сабаб бўлмоқда.