Волгограддаги колонияда ходимларни гаровга олган маҳбуслар йўқ қилинди. Сўнгги маълумотлар

Росгвардия гаровга олинганларни озод қилиш амалиёти муваффақиятли якунлангани ҳақида маълум қилди. Росгвардиянинг махсус топшириқли бўлинмаси Волгоград области Суровикино шаҳрида 19-сонли колонияда 23 август куни ўтказилган штурм чоғида одамларни гаровга олган тўрт  маҳбусни ҳам йўқ қилди.

«Росгвардиянинг Волгоград области бўйича махсус бўлинмаси мерганлари тўртта аниқ ўқ отиш орқали колония ходимларини гаровга олган тўрт маҳбусни йўқ қилди. Гаровдагилар озод этилган», — деган «Интерфакс»га идорадаги манба.

19-сонли ахлоқ тузатиш муассасасида ИШИД террорчилик гуруҳига алоқадорликда гумон қилинаётган тўрт маҳбус 23 август куни колония ходимларини гаровга олганди. Волгоград области губернатори Андрей Бочаровнинг хабарига кўра, колонияга ҳужумдан кейин Федерал жазони ижро этиш хизматининг тўрт ходими шифохонага ётқизилган. 

Федерал жазони ижро этиш хизмати қамоқхонада жами саккиз киши гаровга олингани ҳақида маълумот берган.

Маҳбуслар ходимлардан тўрт нафарини тиғ билан жароҳатлаган, шундан уч нафари воқеа жойида ҳалок бўлган. Яна тўрт ходим штурм бошланишидан олдинроқ шифохонага ётқизилган, улардан бири шифохонада жон берган. 

Шу тариқа, қамоқхонадаги ҳодиса оқибатида жами саккиз киши ҳалок бўлгани, штурм давомида фақат бир киши озод этилгани маълум бўлмоқда.

Ҳужум қилганлар ҳақида нималар маълум?

ТАСС дастлаб оператив хизматларга таянган ҳолда исён кўтарган маҳбуслар сони камида уч нафарлиги, уларнинг барчаси 19-сонли колонияга қамалганлар экани ҳақида маълумот тарқатди.

Baza улар ИШИДга алоқадорлигини эълон қилгани ҳақида хабар тарқатди. Бу маълумот ҳозирча расмий тасдиқланмаган.

Кейинроқ ТАСС суд ҳукмларига таяниб, 19-сонли колонияда ходимларни гаровга олган гуруҳдаги уч киши гиёҳвандлик моддалари савдоси учун, яна бири муштлашув чоғида одам ўлдиргани туфайли қамалгани ҳақид хабар тарқатди.

Baza, Shot ва «Осторожно, новости» телеграм-каналларида уларнинг фотолари ва шахсий маълумотлари эълон қилинди.

Каналлар маълумотига кўра, гаровга олишда қуйидаги тўрт киши иштирок этган: 28 ёшли Рамзиндин Тошев ва Назиржон Тошов, 23 ёшли Рустамжон Наврўзий ва 29 ёшли Темур Ҳусинов.

ТАСС маълумотига кўра, Тошев 2023 йилда гиёҳвандлик моддаларни ноқонуний ишлаб чиқариш, сотиш ёки жўнатиш моддаси бўйича айбланиб, 8 йил муддатга озодликдан маҳрум этилган.

Назиржон Тошов ҳам 2022 йилда худди шу модда бўйича (РФ ЖК 228.1-модда, 4-қисми, «г» банди) айбланиб, 8,5 йилга қатъий тартибли колонияга ҳукм қилинган. Рустамжон Наврўзий ҳам ўша йили худди шу модда бўйича 7 йилга қамалган.

Темур Ҳусинов 2019 йилда қасддан баданга оғир шикаст етказишда айбли деб топилиб, 6 йилга қамалганди ва икки ярим ойдан кейин — шу йил ноябрида озодликка чиқиши керак эди.

Дастлаб телеграм-каналларда маҳбуслар гаровдагиларни озод этиш эвазига 2 миллион доллар ҳамда вертолёт талаб қилаётгани ҳақида хабарлар тарқалганди, аммо бу маълумот тасдиқланмади.

Гаровга олиш давомида маҳбуслар «Крокус Сити Ҳолл»даги теракт бўйича қўлга олинган «мусулмон биродарлари» учун қасос олишаётганини айтишган. Россия нашрларига кўра, махсус топшириқли бўлинма штурмни соат 16:00 атрофида бошлаган, ўшанда кучишлатар тузилмаларга алоқадор бўлган телеграм-каналлар жиноятчилардан айримлари яралангани ҳақида хабар тарқатганди.

Маҳбусларга кўра, Ростовдаги тергов изоляторига қилинган ҳужумдан сўнг Волгограддаги қамоқхонада мусулмон маҳбусларга нисбатан муносабат ёмонлашган: уларнинг соч-соқоли мажбуран олинган, диний китоблар ўқишига рухсат берилмаган ва намоз ўқиш учун жойнамозлар ҳам берилмаган. 

Маҳаллий нашрлар ушбу ҳолат колония ходимларига ҳужум учун сабаблардан бири бўлганини айтмоқда.

Колониядаги коррупция

Маҳаллий нашрлар ёзишича, 19-сонли колонияда маҳбуслардан пул ундирилган, унинг бир қанча собиқ раҳбарлари коррупцияда айбланиб қамалган, пичоқлар эса қамоқхона ходимлари томонидан эркин сотилган. Shot телеграм-канали ёзишича, 23 август куни ходимларга ҳужум  қилишда ишлатилган пичоқлар ҳам колония ҳудудининг ўзида сотиб олинган бўлиши мумкин. Бундан ташқари, Lenta.ru нашри ёзишича, муассаса ҳудудида алкогол сотиб олиш ҳамда интернетдан фойдаланиш мумкин бўлган.

Baza манбаси ёзишича, сўнгги уч йилда 19-сонли колония бошлиғининг икки нафар собиқ ўринбосари порахўрликда айбланиб қўлга олинган. 2021 йилда қўриқлаш бўлими бошлиғи Николай Борисевич кичик инспектордан ишга келмагани учун пора олаётганида ушланган. Тергов версиясига кўра, инспектор Борисевичга 10–17 минг рублдан тўлаб, ишга бормай юрган, аммо мунтазам равишда маош олган. Борисевичга нисбатан порахўрлик бўйича иш очилган.

2024 йил баҳорида колония бошлиғи ўринбосари Григорий Беленков ҳам порахўрликда айбланган. Тергов версиясига кўра, у тўрт нафар маҳбусдан расман рағбатлантириш пуллари олиши учун воситачи орқали жами 320 минг рубл олган. Суд Беленковни 7 йил муддатга озодликдан маҳрум этган.

• Волгоград областида маҳбуслар колония ходимларини гаровга олиши 16 июн куни Ростов-Донда 1-сонли тергов изоляторида олти нафар маҳбус Федерал жазони ижро этиш хизматининг икки ходимини гаровга олиб, изолятор ҳудудини тарк этишга имкон беришни талаб қилганидан икки ойдан ошиқ вақт ўтганида рўй берди. Уларнинг ёнида ҳам пичоқлар, бошқа тиғли буюмлар ҳамда ИШИД байроғи бўлган. Ўшанда ҳам бир неча соатдан кейин махсус топшириқли бўлинма тергов изоляторини штурм билан эгаллаган, маҳбусларнинг барчаси ўлдирилгани хабар қилинганди, кейинроқ улардан бири тирик қолгани маълум бўлади.