Исроил Иорданнинг Ғарбий соҳилидаги тўрт шаҳарда йирик амалиёт бошлади

Қурбонлар ҳақидаги маълумотлар бир-бирига терс келмоқда: аввалига 11 фаластинлик ҳалок бўлгани айтилганди, аммо кейинроқ бошқа рақамлар келтирилди.

Фаластин расмийларининг сўнгги маълумотларига кўра, исроиллик ҳарбийларнинг ўтган тунда бошланган амалиёти оқибатида камида тўққиз киши ҳалок бўлган: тўрт нафари — Ал-Фараа қочқинлар лагерига авиазарба оқибатида, яна беш киши — Женин ва Тулкармда дронлар зарбаси ва қуролли тўқнашувлар туфайли.

Бу маълумот фаластинлик шифокорлар берган хабарга мос келади: Тубасдаги шифохонага етти жасад олиб келинган, Жениндаги шифохона яна икки жасадни қабул қилиб олган.

Шу билан бирга, Қизил ярим ой жамиятининг Фаластиндаги вакили қурбонлар сони ўн нафардан кам эмаслиги ва ҳатто кўпроқлигини, чунки «тез ёрдам» машиналари ва шифокорлар айрим жабрланганлар олдига етиб бора олмаётганини айтган.

Бу амалиёт — иккинчи интифада (фаластинликларнинг 2000–2005 йиллардаги йирик қўзғолони) давридан буён Фаластиннинг бир вақтнинг ўзида бир неча шаҳри зарба остида қолиши билан боғлиқ илк ҳолатдир.

Ҳамаснинг 7 октябр кунги ҳужуми ва унинг ортидан Ғазо секторида бошланган уруш ортидан Ғарбий соҳилда ҳам зўравонлик ҳолатлари бўлиб ўтди.

Исроил қўшини ушбу ҳудудда рейдлар ўтказиб, буни Исроилда ҳам, Ғарбий соҳилда ҳам фаластинликларнинг ҳужумларининг олдини олиш ва тўхтатишга уриниш сифатида изоҳлайди.

Доимий кескинлик ўчоғи ҳисобланган Женинда Исроил қўшини назорат-ўтказиш пункти ўрнатилган битта йўлдан бошқа барча йўлларни блоклаган.

Фаластин соғлиқни сақлаш вазирлигига кўра, исроиллик ҳарбийлар Жениндаги давлат шифохонасини ва унинг яқинида жойлашган Ибн Сино шифохонасини, шунингдек, Қизил ярим ой жамиятининг Фаластиндаги бўлими штаб-квартирасини ва «Беморлар дўсти» жамияти биносини қуршаб олган.

Исроилликлар икки шифохонани ҳам штурм қилиб эгаллашни режалаштирмоқда, бу эса у ердаги ўнлаб беморлар ҳамда шифокорлар ҳаётига хавф солади.

«Айни вақтда айрим беморлар шифохонани тарк этишга ҳаракат қилмоқда, аммо бунинг учун уларнинг ҳужжатлари ЦАҲАЛ жангчилари томонидан текширилиши лозим. Бу жуда қўрқинчли вазият», — деган BBC мухбирига воқеа жойида бўлган журналистлардан бири.

Исроил қўшини Женин яқинидаги қочқинлар лагерида ҳам рейд ўтказмоқда, бу лагер қуролли гуруҳ базаси сифатида кўрилади ва ўтмишда бу ерда кўплаб йирик қуролли тўқнашувлар бўлиб ўтган.

Лагерда яшовчилардан бири яқин атрофда портлаш овозларини ҳамда осмонда дронлар парвози вақтида чиқадиган овозларни эшитганини айтган, аммо ҳозирча қуролланган жангчилар исроиллик ҳарбийлар билан тўқнашувга киришгани белгилари йўқ.

Унинг сўзларига кўра, Исроилнинг зирҳланган бульдозерлари лагер орқали ўтувчи асосий йўлни бузиб ташлаган ҳамда унинг ҳудудида яширинган жангариларнинг чекиниш йўлини тўсиш учун тўсиқлар ўрнатган.

Тубасда яшовчилардан бири BBC мухбирига Исроил қўшини Ал-Фараадаги қочқинлар лагерига «тобора кўпроқ зирҳли машиналар ва булдозерлар олиб кирмоқда».

«Биз барчамиз хавотир билан эскалация юзага келишига тайёрланяпмиз», — дея қўшимча қилган у.

ЦАҲАЛ матбуот котиби, подполковник Надав Шошани ҳарбийларнинг Ғарбий соҳилдаги рейдларидан мақсад — «террорчи гуруҳ ва террорчиларнинг инлари»ни йўқ қилиш эканини айтган, аммо амалиёт қанча давом этиши ва унда шахсий таркибнинг қанча аъзоси иштирок этаётгани ҳақидаги саволларни очиқ қолдирган.

Мамлакат ташқи ишлар вазири Исраэл Кац Исроил мудофаа армияси «ўтган тундан бошлаб Жени ва Тулкармдаги қочқинлар лагерларида ташкил этилган Эрон террори инфратузилмаларини йўқ қилиш учун тўлиқ куч билан амалиёт бошлагани»ни айтган.

Кац Ҳамас ва «Ислом жиҳоди»ни қўлловчи Эронни Ғарбий соҳилда Исроилга қарши янги фронт очишга интилаётганликда айблаган.

«Биз Ғазодаги террорчилик инфратузилмага қарши қандай курашаётган бўлсак, бу таҳдид билан ҳам шундай курашишимиз керак, жумладан, Фаластин аҳолисини вақтинча эвакуация қилиш ва барча зарур чораларни кўриш орқали», — дея қўшимча қилган у.

Исроил армияси баёнотида тафсилотлар кам, аммо унда ЦАҲАЛ билан бирга «Шин-Бет» ички хавфсизлик хизмати ва Исроил чегара полицияси «айни вақтда Женин ва Тулкармда террорнинг олдини олиш учун аксилтеррор амалиёт ўтказаётгани» айтилган.

Таҳлил: ҳодиса кўлами ноодатий
Люси Уилямсон, BBC’нинг Яқин Шарқдаги мухбири:

Хабарларга кўра, Жениндаги фақат битта йўл очиқ қолдирилган, қолганлари ҳарбийлар томонидан тўсилган. Шаҳарга кириш жойларида ҳеч кимни киритмаслик ва чиқармаслик учун блок-постлар пайдо бўлган.

Исроил қўшини маҳаллий марказий шифохонани, унга қўшни «Ибн Сино» шифохонасини ҳам ўраб олган. Воқеа жойида бўлган BBC мухбири айтишича, шифохонани тарк этмоқчи бўлган одамлар исроиллик ҳарбийларга шахсини тасдиқловчи ҳужжатларни кўрсатиши талаб этилади ва тинтиб чиқилади.

Ходимларимизнинг сўзларига кўра, бундай тинтувлар Жениндаги қочқинлар лагерида ҳам амалга оширилмоқда. Бу ерда фаластинликларнинг қуролли гуруҳи мавжуд ва бу ерда аввал ҳам исроилликларга қарши кўплаб шиддатли отишмалар бўлиб ўтганди.

Сўнгги 10 ой мобайнида биз бир неча марта исроиллик ҳарбийлар амалиёти чоғида Женинга борганмиз, аммо ҳозирги ҳодисалар кўлами ноодатий кўринмоқда.