Антониу Гутерриш сунъий интеллект ривожланиши билан боғлиқ хатарлардан огоҳлантирди

Сунъий интеллект жадаллик билан ривожланиб, одамлар содир бўлаётган воқеаларни кузатишга улгурмасидан дунёни ўзгартириб юбормоқда. Бу ҳақда БМТ Бош котиби Антониу Гутерриш Хитойга ташрифи давомида ўтказилган сунъий интеллект бўйича семинардаги чиқишида гапириб ўтди.

Гутерришнинг сўзларига кўра, сунъий инеллект Барқарор ривожланиш мақсадларига (БРМ) эришиш ва кучлироқ, адолатли келажакни таъминлашга ёрдам беради: у БРМ эришишни қарийб 80 фоизга тезлаштириши мумкин.

«Бироқ, биз оғир ҳақиқатга дуч келдик: СИ имкониятлари жуда нотекис тақсимланган. Бугун сунъий интеллект потенциали кам сонли давлатлар ва кучли компаниялар чангалида жамланган. Кўплаб мамлакатлар СИ инструментларидан фойдаланишда жиддий муаммоларга дуч келмоқда. Унинг потенциалидан ҳақиқатда фойдаланиш учун халқаро ҳамкорлик ва бирдамлик керак», — дейди БМТ Бош котиби.

Гутерришнинг қўшимча қилишича, СИ билан боғлиқ хатарларни олдиндан айтиб бўлмайди: тегишли кафолатларсиз сунъий интеллект тенгсизликни янада кучайтириши ва номутаносиб равишда энг заиф қатламларга таъсир кўрсатиши мумкин.

БМТ Бош котибининг сўзларига кўра, айни вақтда Глобал рақамли шартномани имзолаш бўйича музокаралар ўтказилмоқда — у Нью-Йоркда ўтказиладиган саммитда қабул қилиниши режалаштирилган. Шунингдек, сентябрда СИ бўйича Олий даражадаги маслаҳат органи бир қатор муҳим тавсияларни ўз ичига олган якуний ҳисоботини эълон қилади.