Ўзбекистонда ҳайвонларни ҳимоя қилишга чорловчи 224 млн сўмлик ролик тайёрланади. Маблағни халқаро ташкилот ажратган

Ветеринария ва чорвачилик қўмитаси Бутунжаҳон ҳайвонлар соғлигини ҳимоя қилиш ташкилотининг 100 йиллигига бағишланган видеоролик тайёрлаш ва уни тарғиб қилиш бўйича бошланғич нархи 370 млн сўмлик танлов ўтказди. Бунга Telegram'даги “Ревизор” канали эътибор қаратди.

Тендер 23 августдан бошланиб, 30 августда якунланган. Талабгорлардан Бутунжаҳон ҳайвонлар саломатлиги ташкилотининг 100 йиллигига бағишланган 3 дақиқалик видеоролик ишлаб чиқиш, Ўзбекистон Республикаси ва чет эл телеканалларида, YouTube ва Telegram-каналларида тарғибот ишларини олиб бориш сўралган.

Танловда энг арзон – 224 млн сўм нарх таклифини берган “Satart-Haus-Building” МЧЖ ғолиб деб топилган. Тошкент шаҳрида фаолият юритадиган бу корхона яшашга яроқсиз жойларни ижарага бериш ва бошқариш билан шуғулланади. 2020 йилда ташкил этилган, устав фонди – 1 млн сўм. Таъсисчиси – Бойжитов Фаррух Нормаҳамадинович.

Ветеринария ва чорвачилик қўмитаси матбуот котиби Анвар Суюновнинг Kun.uz'га айтишича, бу видеороликни тайёрлаш ва тарғиб қилиш учун бюджет маблағлари сарфланмайди.

“Бу ролик халқаро ҳайвонлар соғлиғини ҳимоя қилиш ташкилоти томонидан ажратилган грант маблағлари ҳисобидан тайёрланади. Роликнинг таннархини ташкилот доллар ёки еврода белгилаб берган, биз сўмга конвертация қилиб тендерга қўйганмиз. Очиқ тендер ўтказиш талабини ҳам ҳайвонлар соғлиғини ҳимоя қилиш ташкилоти қўйган. Жорий йилда ташкилот ўзининг 100 йиллигини нишонлайди, шу сабабли улар Ўзбекистонга ҳам грант маблағларини ажратган.

Бундан ташқари, бу 370 млн сўм маблағ фақат 3 дақиқалик видеороликни тайёрлашга сарфланмайди. Унинг тарғиботи ҳам бор. 3 та телеканалда роликни айлантириш харажатлари ҳам шу маблағнинг ичига киради.

Энди биноларни ижарага бериш билан шуғулланадиган компания тендерда ютганига тўхталсам. Тендер талабларида энг арзон нарх таклиф қилган, халқаро ташкилотлар билан ишлаш тажрибаси бўлган, тўлов қобилиятига эгалиги каби критерийларга жавоб бера оладиган компания ғолиб сифатида танланган. Бу компания бошланғич нархдан анча паст нарх – 224 млн сўм таклиф қилди. Лекин шунда ҳам бу маблағ қисқа роликни тайёрлашга етса ҳам, тарғиботга етмаслиги мумкин. Телеканалларда реклама нархлари ҳам арзон эмас”, – деди қўмита матбуот котиби.

Аввалроқ Маънавият ва маърифат маркази “qadriyatim.uz”, “tanlov.manaviyat.uz” сайтлари ва мобил иловаларини яратиш учун 1,2 млрд сўм сарфлаши муҳокамаларга сабаб бўлганди. Шундан кейин Рақобат қўмитаси ижрочи сифатида “United IT company” МЧЖни танлаб олишда “Рақобат тўғрисида”ги қонун бузилгани аломатларини аниқлаб, марказга нисбатан иш қўзғатди.