SpaceX биринчи шахсий тадқиқот миссиясини учирди. Нопрофессионал астронавтлар очиқ космосга чиқади

SpaceX компанияси бортида оддий фуқаролардан иборат экипаж бўлган Polaris Daws тижорий миссиясини учирди.

Crew Dragon миссияси беш кун давом этади. Унинг таркибидан Polaris миссиясини SpaceX компанияси билан биргаликда молиялаштирган миллиардер Жаред Айзекман ва АҚШ Ҳарбий-ҳаво кучларининг истеъфодаги подполковниги Скотт Потит ўрин олган.

Шунингдек, ҳаво кемасининг бортида SpaceX’нинг икки ходими ҳам бор: космик операциялар бўйича етакчи муҳандис Анна Менон ва астронавтларни тайёрлашни назорат қилувчи муҳандис Сара Жиллис.

Миссия доирасида нопрофессионал астронавтларнинг очиқ космосга илк чиқиши режалаштирилган (у миссиянинг учинчи кунида — 12 сентябрда амалга оширилади). Шунингдек, Polaris Dawn миссияси бундан 50 йилдан ортиқроқ вақт олдин NASA Ойга қўнганидан бери амалга ошириладиган энг узоқ парвоз бўлади.

Polaris Dawn’нинг учирилиши аввалига 28 августга режалаштирилган эди, аммо техник сабабларга кўра у бир неча бор кечиктирилди.

Бир неча кун олдин SpaceX асосчиси Илон Маск компания икки йил ичида Марсга Starship космик кемасини учиришни режалаштираётгани, сайёрага биринчи одамнинг парвози тўрт йил ичида амалга ошиши мумкинлигини маълум қилганди.