Тошкент вилоятидаги бўёқ заводида юз берган ёнғин қарийб 4,5 соатда тўлиқ ўчирилди

Тошкент вилояти Зангиота туманида жойлашган бўёқ ишлаб чиқариш заводида ёнғин содир бўлгани тўғрисида хабар берилганди. Фавқулодда вазиятлар вазирлигининг маълум қилишича, ёнғин соат 18:56 да батамом ўчирилган.

«Эркин» МФЙда жойлашган бўёқ ишлаб чиқариш цехи биносида чиққан ёнғин ҳақида 10 сентябр соат 14:15 да вилоят ФВБга хабар берилган. 

«Ёнғин ўчириш экипажлари томонидан ёнғин соат 17:00 да қуршаб олиниб, соат 18:56 да батамом ўчирилди», — дейилади хабарда.

Қайд этилишича, ёнғин оқибатида тан жароҳати олган ва вафот этган фуқаролар тўғрисида хабар келиб тушмаган.

Ёнғинни бартараф этиш жараёни фавқулодда вазиятлар вазири генерал-майор Абдулла Қўлдошев назоратида амалга оширилган.

«Айни вақтда ёнғин сабаби ва зарари аниқланмоқда. Ҳурматли фуқаролар, Фавқулодда вазиятлар вазирлиги сизлардан ёнғин хавфсизлиги қоидаларига қатъий риоя қилишингизни сўраб қолади», — дея таъкидланади ФВВ хабарида.