Россияга юқори аниқликдаги Ғарб қуроллари билан зарба бериш НАТО урушда бевосита иштирок этишини англатади – Путин

Украинанинг юқори аниқликдаги Ғарб қуроллари билан Россия ҳудудига зарбалари НАТО давлатлари урушда бевосита иштирок этаётганини билдиради. Бу ҳақда Россия президенти Владимир Путин маълум қилди.

Путиннинг сўзларига кўра, Украина Қуролли кучлари бундай зарбаларни амалга оширишга қодир эмас, бу фақат Украинада мавжуд бўлмаган НАТО сунъий йўлдошлари маълумотларидан фойдаланган ҳолда амалга оширилиши мумкин. Бундан ташқари, Путиннинг фикрича, фақат алянс ҳарбий хизматчилари «ушбу ракета тизимларига парвоз вазифаларини юклаши мумкин».

«[Биз бундай зарбаларга рухсат бериш қарори ҳақида гапирганда], НАТО давлатлари ҳарбий можарода бевосита иштирок этадими ёки йўқми, деган қарорни қабул қилиш ҳақида гапирамиз», деди Путин.

Путин сўзларига кўра, агар қарор қабул қилинса, бу «можаронинг моҳиятини, табиатини ўзгартиради» ва бу НАТО мамлакатлари Россия билан уруш ҳолатида эканлигини билдиради.

Владимир Путин аввалроқ НАТО давлатлари урушда қатнашаётгани ҳақида бир неча бор фикр билдирган. «Маслаҳатчилар ва инструкторлар нуқтаи назаридан бу ерда ҳеч қандай янгилик йўқ. Улар Украина ҳудудида мавжуд», деган эди у, хусусан, июн ойида. Кейин у Украина Қуролли Кучлари ATACMS ва Storm Shadow ракеталарини бошқара олмаслигига ишонч билдирди.

Илгари Ғарб давлатлари Украинага етказилган юқори аниқликдаги қуроллар билан Россия ҳудудига зарба йўллашга рухсат бермаган эди. Бироқ, Буюк Британия ташқи ишлар вазири Дэвид Лэмми ва АҚШ давлат котиби Энтони Блинкеннинг Киевга ташрифидан сўнг, Лондон бундай чекловни бекор қилган бўлиши мумкин. Бу ҳақда расман эълон қилинмади, бироқ The Guardian газетаси ўз манбаларга таяниб ёзди. Блинкен ўз ташрифи давомида АҚШ ATACMS ракеталарига қўйган тақиқни бекор қилиши мумкинлигига ишора қилди.