Inbazar дўконида ёш ходим хатоси учун калтакланди

Ижтимоий тармоқларда Inbazar савдо тармоғи ходими қўл остидаги ёш ходимни куч ишлатиб, жазолаётгани акс этган видео тарқалди. Ходим, гарчи «билмасдан қилдим», дея узр сўраганига қарамай, раҳбари ёш йигитнинг юзи ва танасига 5-6 маротаба урган. Шунингдек, ҳақорат ҳам қилган.

Inbazar асосчиси Холматов Омадбек бу ҳолат бўйича қонуний чора кўрилишини маълум қилди.

«Ижтимоий тармоқларда тарқалган видеони кўриб, ўзим шок бўлиб қолдим. Бу қилинган аблаҳона иши учун албатта қонуний жавобгарликка тортилишига ишончимиз комил. Йиллар давомида ишхонада ўзаро ҳурмат бўлишига ҳаракат қиламиз, лекин кўп одам ишлагани учун буни назоратини ола олмай қолибмиз. Бунинг учун узр сўраймиз.

Лекин бу зўравонликка қаршимиз, бу ҳолат бўйича қонуний чоралар кўриляпти. Тафсилотларини айтамиз», деган дўкон асосчиси.