Қирғизистонда Асқар Акаевга собиқ президент мақомини қайтариш рад этилди

Парламент қўмитаси депутати Асқар Акаев президентлик даврида мамлакатда оилавий-кланлар бошқаруви гуллаб-яшнагани, инсонлар ўлимига олиб келган Ахси воқеалари содир бўлганини эслатиб ўтган.

Фото: Wikimedia

Қирғизистон Жогорку Кенешининг Конституциявий қонунчилик, давлат тузилиши, суд-ҳуқуқ масалалари ва регламент қўмитаси Асқар Акаевга собиқ президент мақомини қайтаришни рад этди.

Қайд этилишича, қўмита йиғилишида депутат Гуля Кожокулова мазкур масалани ҳар томонлама ўрганиб чиқиш учун вақтинчалик депутатлик комиссиясини тузиш таклифини берган.

Халқ депутати Жанар Акаев комиссия тузилишига қарши чиқиб, Асқар Акаев президентлик даврида мамлакатда оилавий-кланлар бошқаруви гуллаб-яшнагани, инсонлар ўлимига олиб келган Ахси воқеалари содир бўлганини эслатиб ўтган.

Муҳокама якунида қўмита Асқар Акаевнинг сўровини инобатга олган ва унинг вақтинчалик депутатлик комиссиясини тузиш тўғрисидаги аризасини рад этиш бўйича тақдимнома билан Жогорку Кенешга кўриб чиқиш учун тақдим этган.

Қирғизистоннинг собиқ президенти Асқар Акаев 5 сентябрда Жогорку Кенешга (парламент) «собиқ президент» мақомини тиклаш бўйича сўров йўллаган. Асқар Акаев Қирғизистонни мустақилликнинг илк йилларидан 2005 йилгача бошқарган. Мамлакатда инқилоб юз бериб, Қурманбек Бакиев ҳокимиятга келгач, ағдарилган Акаев ва унинг оила аъзолари Россияга қочиб кетган.