«Толибон» ОАВда тирик мавжудотлар тасвирини тақиқлашга ваъда берди

Журналистларга кўра, янги қонун билан оммавий ахборот воситалари учун бир қанча қоидалар батафсил баён этилган бўлиб, у бутун Афғонистон ҳудудига тааллуқли ва босқичма-босқич жорий этилади.

Фото: Getty Images

Афғонистондаги «Толибон» ҳаракатининг Ахлоқ вазирлиги ОАВга тирик мавжудотлар тасвирини эълон қилишни тақиқловчи қонун лойиҳасини ишга туширишга ваъда берди, деб ёзади France 24.

«Қонун бутун Афғонистон ҳудудига тааллуқли ва у босқичма-босқич жорий этилади», — дейди Эзгуликни тарғиб қилиш ва иллатларнинг олдини олиш вазирлиги вакили Сайфул Ислом Хайбер.

Янги қонун оммавий ахборот воситалари учун бир қанча қоидаларни батафсил баён қилади, жумладан, барча тирик мавжудотлар тасвирини чоп этиш, шунингдек, ОАВга исломни масхара қилиш, камситиш ёки ислом қонунларига қарши бориш тақиқланади.

Янги қонуннинг айрим жиҳатлари, хусусан, кенг жамоатчиликка телефонлар ва бошқа қурилмаларда тирик мавжудотларни тасвирга олмаслик ёки уларни томоша қилмаслик каби талабларга қатъий риоя этилмаяпти. «Толибон» амалдорлари мунтазам равишда ижтимоий тармоқлар орқали инсонларнинг суратларини эълон қилиб келмоқда. АФПга кўра, ҳукумат янги қонун эълон қилинганидан кейин ҳам афғон журналистлари ўз фаолиятини давом эттиришлари мумкинлиги ҳақида хабардор қилинган.

Аввалроқ «Толибон» ҳукумати вакиллари Ўзбекистондан «Термиз» чегара бозорида концерт ва мусиқа дастурларини бекор қилишни сўраган эди. Акс ҳолда Афғонистон фуқаролари умумий бозорга киритилмаслиги айтилган. Таъкидланишича, «Толибон» ва Ўзбекистон вакиллари бу борада расман ҳеч қандай маълумот бермаган. Ўзбекистон «Толибон»нинг бу талабини бажариши ёки йўқлиги ҳам номаълум.

#Афғонистон #Толибон