Беларусда президентлик сайлови санаси белгиланди

Вакиллар палатаси (Беларус парламентининг қуйи палатаси) навбатдаги президентлик сайлови санаси ҳақида қарор қабул қилди. Сайлов 2025 йил 26 январида бўлиб ўтади, деб хабар берди БелТА.

Марказий сайлов комиссияси раиси Игор Карпенконинг айтишича, комиссия сайлов кампанияси бошланишига ҳозирданоқ тайёр.

Беларус президенти 5 йил муддатга сайланади. 2022 йилги референдумдан сўнг мамлакатда президентликка номзодларга қўйиладиган талаблар кучайтирилди. Шундай қилиб, энди давлатнинг энг юқори лавозимига фақат Беларусда туғилган, камида 40 ёшга тўлган ва сайловдан олдин камида 20 йил давомида Беларусда доимий яшаган фуқаролар номзод бўлиши мумкин.

Республикада сўнгги сайловлар 2020 йил 9 августда бўлиб ўтди. Беларус Марказий сайлов комиссияси 80,1 фоиз овоз билан Александр Лукашенкони ғолиб деб топди. Унинг рақиби Светлана Тихановская расман 10 фоиз овоз тўплади. Сайлов натижалари эълон қилинганидан кейин мамлакатда бир неча кун давомида оммавий норозилик намойишлари бўлиб ўтди. Тихановская мамлакатни тарк этди ва унга қарши бир неча жиноий иш очилди.

Амалдаги президент Александр Лукашенко 1994 йилдан бери - кетма-кет олти муддат президент бўлиб ишлаган. Жорий йил феврал ойида у яна ўз номзодини қўйиш режалари ҳақида гапирди, бироқ август ойида у фуқароларни мамлакатда янги президент бўлишига «кўникишга» чақирди. Шу билан бирга, у беларусларни «эртага ёки индинга» тарк этмаслигини таъкидлади.