Саудия Арабистони БРИКСга аъзолик таклифини рад этди

Ушаковнинг сўзларига кўра, Қозонга валиаҳд шаҳзода Муҳаммад бин Салмон ўрнига ташриф буюрган подшоҳлик ТИВ раҳбари Файсал бин Фархон Ол Сауд «таклиф этилган давлат вакили сифатида иштирок этади».

«Яъни айтиш мумкинки, Саудия Арабистони БРИКС саммитида эмас, балки «Аутрич/БРИКС Плюс»да иштирок этади», — дейди Россия президентининг ёрдамчиси. Бу ташкилотга аъзо бўлмаган давлатлар учун мўлжалланган кенгайтирилган формат ҳисобланади.

Кремл январ ойида 2024 йилдан бошлаб Саудия Арабистони БАА, Эфиопия, Миср ҳамда Эрон билан биргаликда БРИКС таркибига қўшилганини эълон қилганди. Орадан икки ҳафта ўтгач подшоҳлик савдо вазири Мажид ал-Касаби Россия баёнотини рад этиб чиқди, Ар-Риёд эса БРИКСга аъзолик таклифи ҳамон кўриб чиқилаётганини билдирди.

Шунга қарамай, Саудия Арабистони саммит тақдимотига тўлақонли аъзо сифатида киритилган. Дунёдаги энг йирик нефт экспортчиларидан бири бўлган ва Кремлнинг «қора олтин» бозоридаги асосий шериги ҳисобланувчи Саудия Арабистонининг мақоми — ноаниқ. Президент матбуот котиби Дмитрий Песковнинг айтишича, Қозондаги БРИКС саммити ушбу давлатнинг позициясига ойдинлик киритиши керак.

Кремл Қозонда ўтказилаётган саммитни Россия тарихида ўтказилган энг муҳим аҳамиятга эга ташқи сиёсий воқеа деб эълон қилди. Саудиянинг 39 ёшли валиаҳди Муҳаммад бин Салмон саммитда иштирок этиш таклифини олган дунёнинг яна 14 етакчиси билан бирга Россияга боришдан бош тортган. Ушаковнинг таъкидлашича, Россиянинг «шерикларига» ғарб босим ўтказмоқда.