Қамчиқ довонида юк машинаси ёниб кетди

Ёнғин сабабли Қамчиқ довонидан ўтган халқаро йўлнинг бир томонида қатнов тўхтаб қолган.

Фото: Видеодан кадр

Қамчиқ довонидан ўтган халқаро автомобил йўлида юк машинасида ёнғин содир бўлган. Бу ҳақда ИИВ ЙҲХББ ахборот хизмати хабар бермоқда.

Ҳодиса бугун, 2024 йил 3 ноябрь куни соат 14:30 ларда содир бўлган. Қамчиқ довонидан ўтувчи А-373 автомобиль йўлининг 226-километрида "Водий-Тошкент" йўналишида ҳаракатланаётган юк автомобилида қисқа туташув сабабли ёнғин юзага келган.

“Айни вақтларда ФВВ ходимлари томонидан ёнғинни ўчириш чоралари кўрилмоқда. Ҳаракат хавфсизлиги ЙПХ ходимлари томонидан тўлиқ таъминланмоқда. "Водий-Тошкент" йўналишида вақтинчалик ҳаракат тўхтатилган. Ёнғин ўчирилгач, ҳаракат тўлиқ очилади”, дейилади хабарда.

Қайд этилишича, ҳодисада ҳеч ким тан жароҳати олмаган ва ҳалок бўлмаган.

Тайёрлаган: Ғайрат Йўлдошев

#юк машинаси #ёнғин #Қамчиқ довони