Дунёнинг энг бадавлат ўн кишиси Трампнинг қайта сайланиши туфайли рекорд даражада бойиди

Умумий ҳисобда энг бадавлат 10 кишининг умумий бойлиги 64 миллиард долларга кўпайди. Бу Трампнинг дерегуляция билан боғлиқ сиёсатни ва бизнесни қўллаб-қувватловчи бошқа қонунларни ваъда қилгани боис юз бергани таъкидланмоқда.

Фото: The New York Times

6 ноябр фақат Доналд Трамп учун қувончли кун бўлмади. Bloomberg хабарига кўра, дунёдаги энг бадавлат 10 кишининг бойлиги ҳам рекорд даражада ўсди.

Маълумотларга кўра, Трампнинг қайта сайланиши унинг энг очиқ ва содиқ тарафдорларидан бири бўлган Илон Маск бойлигини 26,5 миллиард долларга кўпайтирди. Энди тадбиркорнинг давлати 290 миллиард долларга баҳоланмоқда.

Шунингдек, Amazon асосчиси Жефф Безос ўзига тегишли бўлган Washington Post газетаси анъанавий тарзда демократлар вакили Камала Ҳаррисни қўллаб-қувватлашини эълон қилмаслигини айтганидан кейин, бир ҳафта ичида 7,1 миллиард долларга бойиди.

Oracle асосчиси, Трампнинг яна бир тарафдори Ларри Эллисон 6 ноябр куни бойлиги 5,5 миллиард долларга ошганини кўрди.

Бошқа «бахтиёрлар» орасида Microsoft собиқ раҳбарлари Билл Гейтс ва Стив Балмер, Google собиқ раҳбарлари Ларри Пейж ва Сергей Брин ҳамда Berkshire Hathaway бош директори Уоррен Баффет ҳам бор. Бу миллиардерларнинг ҳеч бири бу йил бирор номзодни қўллаб-қувватламаган бўлса-да, улар ўтмишда демократлар фойдасига гапирган.

Умумий ҳисобда энг бадавлат 10 кишининг умумий бойлиги 64 миллиард долларга кўпайди.

Bloomberg нашрининг таъкидлашича, 5 ноябр куни сайловнинг тезда якунлангани ва Трампнинг ғалабаси бўйича прогнозлар қимматли қоғозлар бозорини тезда ўстирди. Республикачилар вакили сайловолди кампаниясида дерегуляция билан боғлиқ сиёсатни ва бизнесни қўллаб-қувватловчи бошқа қонунларни ваъда қилгани боис, инвесторлар буни қимматли қоғозлар бозорига фойда келтириши мумкинлигини ҳис қилди.

#АҚШ #энг бадавлат кишилар #Доналд Трамп