Швеция прокуратураси Болтиқ денгизи тубидан ўтган кабелларга шикаст етказилишини қўпорувчилик деб баҳолади

Швеция прокуратураси Болтиқ денгизидаги иккита сувости кабелининг шикастланиши билан боғлиқ қўпорувчилик ҳаракати бўйича дастлабки терговни бошлади. Бу ҳақда идора пресс-релизида сўз боради.

Қайд этилишича, мазкур иш билан полициянинг Миллий тезкор департаменти шуғулланмоқда, дастлабки терговни эса давлат прокурори Хенрик Седерман олиб боряпти. Унинг сўзларига кўра, айни вақтида ушбу жиноят қўпорувчилик ҳаракати дея таснифланмоқда.

«Тергов дастлабки босқичда. Ҳозирда ҳеч қанақа қўшимча маълумот йўқ», — дея қўшимча қилади прокурор.

18 ноябр куни Болтиқ денгизи тубидан Финландиядан Германияга ва Швециядан Литвага ўтган кабелларга шикаст етказилгани маълум бўлди. Германия ва Финландия Ташқи ишлар вазирликлари тергов олиб борилаётгани, бу каби ҳолат «қасддан амалга оширилгани бўйича шубҳа уйғотаётганини» маълум қилди. Литва Бош прокуратураси вакили идора расмий тергов бошлаш бўйича маълумот тўплаётганини билдирди.

Эслатиб ўтамиз, ўтган йилнинг октябрида Финландия ва Эстония ўртасидаги Balticconnector сувости газ қувурига шикаст етказилганди. Кейинроқ носозликка Хитойнинг Newnew Polar Bear юк кемаси алоқадор экани аниқланган. South China Morning Post ўз манбаларига таяниб, Хитой ўзига тегишли юк кемаси газ қувурига тасодифан шикаст етказганини тан олгани ҳақида ёзганди.