Европа компаниялари иқтисодий қулаш фонида минглаб иш ўринларини қисқартиришни бошлади

Оғир иқтисодий вазият ва кўплаб товарларга бўлган талабнинг камлиги Европа компанияларини янги ходимларни ёллашдан чекламоқда ёки ишдан бўшатишларга олиб келяпти.

Норвегиянинг DNB кредитори фоиз ставкаларининг пасайиши ва рақобатнинг кучайишига тайёргарлик кўриш учун олти ойда 500 нафар иш ўрнини қисқартиришини маълум қилди. Испаниянинг Santander банки эса Британиядаги бўлинмасининг 1,4 мингдан ортиқ ходими ишдан бўшатилишини маълум қилди. UniCredit компанияси бўлса касаба уюшмалари билан 1000 нафар ходимни ўз хоҳиши билан ишдан бўшатиш ва 500 нафар янги ишчини ёллашга келишиб олди.

Автомобил эҳтиёт қисмларини етказиб бериш бўйича дунёдаги энг йирик компаниялардан бири ҳисобланган Bosch 2027 йил охирига қадар 3,5 минг иш ўрнини қисқартирмоқчи. Франциянинг Michelin шина ишлаб чиқарувчиси мамлакат ғарбидаги иккита заводини ёпади — бу 1250 нафар ходимни ишсиз қолдиради. Автомобил эҳтиёт қисмларини ишлаб чиқарувчи Германиянинг Schaeffler заводи 4,7 мингта иш ўрнини қисқартириш, Австрия ва Буюк Британиядаги иккита заводини ёпиш режаларини маълум қилди.

Stellantis автоконцерни Англия жанубидаги Vauxhall фургонлар заводини ёпмоқчи — бу 1000 дан ортиқ иш ўрни қисқаришини англатади. Франциянинг Valeo автомобил эҳтиёт қисмларини етказиб берувчиси эса Европада мингга яқин иш ўрнини қисқартиради.

Швециянинг Northvolt аккумулятор ишлаб чиқарувчиси 1,6 минг ходимини ишдан бўшатиш режаси билан бўлишди. Thyssenkrupp пўлат қуйиш бўлинмаси 2030 йилга бориб 5 минг иш ўрнини қисқартиради.

Франциянинг Auchan супермаркетлар тармоғи ўз дўконларида трафик тушиб кетгани фонида 2 мингдан ортиқ ходимини қисқартиради. Швециянинг Husqvarna боғдорчилик ускуналари ишлаб чиқарувчиси эса истеъмол ҳаражатлари чеклангани туфайли 400 га яқин ходими билан ҳайрлашади. Шунингдек, Telia телеком-оператори 2024 йилда 3 мингга яқин иш ўрнини қисқартиришни режалаштирган.

Airbus аэрокосмик гуруҳ 2026 йил ўрталарига бориб Defence and Space бўлинмасидаги 2,5 мингга яқин ходимини ишдан бўшатмоқчи эканини маълум қилди. Норвегиянинг нефть, газ ва қайта тикланувчи энергиялар ишлаб чиқарувчи Equinor компанияси қайта тикланувчи энергетика бўлинмасидаги 20 фоиз ходими қисқаришини эълон қилди.

Швециянинг Idorsia фармацевтика компанияси реструктуризация доирасида 270 га яқин ходими ишдан бўшатилишини маълум қилди. Lufthansa административ ходимларини босқичма-босқич 20 фоизга қисқартириши кутилмоқда. Британиянинг Mondi қадоқлар ишлаб чиқарувчиси Болгариядаги қоғоз фабрикасини ёпади — бу 300 га яқин ходимни ишсиз қолдиради.

Қуёш энергетикаси учун эҳтиёт қисмлар етказиб берувчи SMA Solar компанияси бутун дунё бўйлаб 1,1 минг иш ўрнини қисқартиришини билдирди. Белгиянинг кимёвий моддалар ишлаб чиқарувчи Syensqo компанияси Франция, АҚШ, Белгия ва Италиядаги 300-350 нафар ходимини ишдан бўшатади.

Финляндиянинг EPM енгил саноат гуруҳи Германиядаги заводини ёпади — бу 154 иш ўрнига таъсир кўрсатади, шунингдек, ўзининг Fibres Finland бўлинмасида 110 та иш ўрнини қисқартиради. Норвегиянинг Yara ўғитлар ишлаб чиқарувчиси Белгиядаги заводида 115 га яқин ходимини ишдан бўшатишини маълум қилган.